بيشىمبايەۆ پەن بايجانوۆ سوتتاعى سوڭعى ءسوزىن ايتتى
استانا. KAZINFORM - كوپشىلىكتىڭ نازارىن اۋدارعان اتىشۋلى بيشىمبايەۆتىڭ سوتى اياقتالۋعا جاقىن. استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءوتىپ جاتقان سوت پروتسەسىندە بۇگىن ەكى ايىپتالۋشى - قۋاندىق بيشىمبايەۆ پەن باقىتجان بايجانوۆ سوڭعى ءسوزىن ايتتى.
قۋاندىق بيشىمبايەۆ بۇعان دەيىن العا تارتقان فاكتىلەردى تاعى ءبىر مارتە ەسكە سالىپ، سالتانات نۇكەنوۆانى قاتىگەزدىكپەن ولتىرمەگەنىن جەتكىزدى.
ءسوز اراسىندا ەكىنشى دۇنيەجۇزىلىك سوعىس كەزىندە فاشيستىك گەرمانيانىڭ ناسيحات ءمينيسترى بولعان گەببەلستىڭ «وتىرىك سۇمدىق بولعان سايىن وعان سەنۋ وڭاي» دەگەن پىكىرىن قوسىپ، الەۋمەتتىك جەلىلەر ارقىلى بۇكىل قوعام ءوزىن قارالاپ جاتقانىن اتاپ ءوتتى.
ول سالتاناتتىڭ جانە ءوزىنىڭ تۋعان-تۋىستارىنان كەشىرىم سۇراپ، القا بيلەر ءادىل شەشىم شىعاراتىنىنا سەنىم ءبىلدىردى.
«مەن كىنالىمىن. مويىندايمىن. ءبىراق قاساقانا ولتىرگەن جوقپىن»، - دەدى بيشىمبايەۆ.
باقىتجان بايجانوۆ تا سوتتاعى سوڭعى ءسوزىن ايتىپ، سالتاناتتىڭ ءولىمىن جاسىرۋ بىلاي تۇرسىن، ءولىم اۋزىندا جاتقانىن بىلمەگەنىن العا تارتتى.
«ءيا، قىزمەتكەرلەردى ۇيلەرىنە قايتارىپ، مەيرامحانانى جاۋىپ، بەينەجازبالاردى ءوشىرۋدى بۇيىرعانىمدى جاسىرمايمىن. ءبىراق مەن سول كەزدە اۋىر قىلمىس جاسالعانىن ءبىلدىم بە؟ انت ەتەمىن. بىلمەدىم. ەگەر بىلگەندە قىلمىستى جاسىرۋ ارەكەتتەرىنىڭ ەشقايسىسىن جاسامايتىن ەدىم. سالتاناتتىڭ تۋعان-تۋىستارىنان تاعى دا كەشىرىم سۇرايمىن. جاتقان جەرى جايلى بولسىن»، - دەدى بايجانوۆ.
سوت پروتسەسى 10-مامىردا جالعاسادى.
ايتا كەتەيىك، ايىپتالۋشى بيشىمبايەۆ بۇعان دەيىن دە سالتاناتتىڭ ولىمىندە ءوز كىنام بار ەكەنىن مويىنداپ، ۇرىپ-سوققانىن جاسىرماعان.
اۆتور
ورالحان قوجانوۆ
