بيشىمبايەۆ ءىسى: ونلاين-كورسەتىلىم رەيتينگى كەيبىر سەريالداردان اسىپ ءتۇستى
استانا. KAZINFORM - جوعارعى سوتتىڭ كوممۋنيكاتسيا ءبولىمىنىڭ مەڭگەرۋشىسى پەريزات ءسادۋاقاس ق. بيشىمبايەۆقا قاتىستى سوت پروتسەسىنە قوعامنىڭ جوعارى قىزىعۋشىلىعىن اتاپ ءوتتى.
سول سەبەپتەن دە ءىس بويىنشا اشىق سوت وتىرىستارىنىڭ ونلاين-ترانسلياتسياسىن ۇيىمداستىرۋ تۋرالى شەشىم قابىلدانعان.
«وسى رەتتە، جوعارعى سوت باسشىلىعىنىڭ سوت پروتسەستەرىن اشىق جانە جاريا تۇردە وتكىزۋگە، سول ارقىلى قوعامدىق باقىلاۋدى كۇشەيتۋگە نيەتتى ەكەنىن اتاپ وتكىم كەلەدى. از ۋاقىت ىشىندە ماتەريالدىق-تەحنيكالىق جابدىقتارىمەن، بارلىق نيەت بىلدىرگەن ب ا ق- تىڭ سوت پروتسەسىنە كەدەرگىسىز، كىدىرىسسىز قاتىسۋى قامتاماسىز ەتىلدى.
بيىلعى 27-ناۋرىزدان باستاپ 9 سوت پروتسەسى بويىنشا 17 تىكەلەي ەفير وتكىزىلدى. جالپى، تىكەلەي ەفيردىڭ رەترانسلياتسياسىنا، پروتسەسسكە ب ا ق- تىڭ قاتىسۋىنا ەشقانداي كەدەرگى، شەكتەۋ بولعان جوق»، - دەدى ول.
پەريزات ءسادۋاقاستىڭ مالىمەتىنشە، قازىر جوعارعى سوتتىڭ تىكەلەي ەفيرىن ترانسلياتسيالاعان TengriNews ينتەرنەت-رەسۋرسىنىڭ اككاۋنتتارىندا ونلاين-ترانسلياتسيانىڭ جۇكتەلگەن جازباسىن كورۋ قارالىمى 20 ميلليوننان اسقان.
«ءبىزدىڭ YouTube ارنامىزداعى جازبانى كورۋ قارالىمى 1,5 ميلليوننان استى. بۇل، مەنىڭ ويىمشا، رەزونانستى ىسكە قاتىستى قوعامنىڭ جوعارى قىزىعۋشىلىعىنىڭ كورسەتكىشى. ونلاين-ترانسلياتسيانى كورۋ اۋماعى ۇلعايۋدا. قازىرگى تاڭدا ءبىزدىڭ ەفيرلەردى ا ق ش، ۇلى بريتانيا، گەرمانيا، بىرىككەن اراب امىرلىكتەرى، تۇركيا، وڭتۇستىك كورەيا، رەسەي، گرۋزيا، مولدوۆا، بەلارۋس، ۋكراينا، وزبەكستان، قىرعىزستان سەكىلدى مەملەكەتتەر كورۋدە. جوعارعى سوتقا وسى سوت پروتسەسىن ءوز ەلدەرىندە ونلاين تاراتۋعا رۇقسات بەرۋ تۋرالى شەتەلدىك ب ا ق- تان ۇسىنىستار تۇسۋدە. ءدال قازىر بۇل ماسەلەنى تالقىلاپ جاتىرمىز»، - دەدى جوعارعى سوت وكىلى.
تىكەلەي ەفيرگە 250 مىڭ كورەرمەننىڭ ءبىر مەزگىلدە قوسىلۋى بويىنشا رەكورد تىركەلدى. 25-44 جاس ارالىعىنداعى كورەرمەندەر جالپى كورەرمەن سانىنىڭ %58 ىن قۇراپ وتىر.
«سونداي-اق، ءبىز جۇرگىزگەن تالداۋعا سايكەس تىكەلەي ەفير كورەرمەندەرىنىڭ %75 قىز- كەلىنشەكتەر. بۇل - ونلاين سوت پروتسەسىنىڭ قوعامدا قۇقىقتىق مادەنيەتتى قالىپتاستىرۋعا جانە قۇقىقتىق ساۋاتتىلىقتى ارتتىرۋعا ىقپالى بولادى دەپ ۇمىتتەنەمىز»، - دەلىنگەن جازبادا.
