بيشىمبايەۆ ءىسى: ماسكەۋدە جاسالعان ساراپتاما ىستەن الىنىپ تاستالدى

استانا. KAZINFORM - استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا سالتانات نۇكەنوۆانى اسا قاتىگەزدىكپەن ءولتىردى دەپ ايىپتالعان ەكس-مينيستر قۋاندىق بيشىمبايەۆتىڭ سوتى جالعاسىپ جاتىر.

بۇگىن سۋديا ايجان قۇلبايەۆا قۋاندىق بيشىمبايەۆتىڭ ادۆوكاتتارى جاساتقان سوت مەديتسينالىق ساراپتامانى سوت قاۋلىسىمەن ىستەن الىپ تاستادى.

سۋديانىڭ ايتۋىنشا، ساراپتاما جاساۋ جونىندە سوتقا ۋاقتىلى حابار بەرىلمەگەن. سايكەسىنشە، ساراپتاما زاڭ بۇزا وتىرىپ جاسالعان.

ەسكە سالا كەتەيىك، 16-ءساۋىر كۇنگى سوتتا بيشىمبايەۆتىڭ قورعاۋشىلارى ءوز باستاماسىمەن ماسكەۋدە جەكە سوت مەديتسينالىق ساراپتاما جاساتقانىن مالىمدەگەن بولاتىن.

پروكۋرور ايجان ايماعانوۆا ونى ىستەن الىپ تاستاۋ كەرەك ەكەنىن العا تارتىپ، سۋدياعا ءوتىنىش جولدادى.

پروكۋروردىڭ ايتۋىنشا، قۇزىرلى ورگاندار جەكە ساراپتاما جاسالىپ جاتقانىن حابارسىز بولعان.

سونداي- اق، ساراپتاما جاساعان ر ف ازاماتتارىن ەشقانداي جاۋاپكەرشىلىككە تارتۋ مۇمكىن ەمەس.

بۇل رەتتە ولار جالعان ساراپتاما جاساۋى مۇمكىن دەگەن كۇمان بار.

ايتا كەتەيىك، رەسەيلىك ساراپشىلار سالتانات نۇكەنوۆانىڭ ءولىمى 3-4 اپتا بۇرىن پايدا بولعان جاراقاتتان بولۋى مۇمكىن دەگەن قورىتىندى جاساعان ەدى.

ال بۇل - قازاقستاندىق ساراپشىلاردىڭ تۇجىرىمداماسىنا قايشى.

اۆتور
ورالحان قوجانوۆ