بيشىمبايەۆ ءىسى بويىنشا سوت شەشىمى ءادىل بولاتىنىنا كۇمانىم جوق - سەنات ءتوراعاسى
استانا. KAZINFORM - سەنات ءتوراعاسى ماۋلەن اشىمبايەۆ سوتتا قۋاندىق بيشىمبايەۆتىڭ ىسىنە قاتىستى ءادىل ءارى وبەكتيۆتى ۇكىم بولاتىنىنا سەنىمدى ەكەنىن ايتتى.
«مەنىڭ ويىمشا، ءبىز قاراستىرىپ جاتقان تۇرمىستاعى زورلىق-زومبىلىق ءۇشىن جاۋاپكەرشىلىكتى كۇشەيتۋ تۋرالى زاڭ قابىلدانعاننان كەيىن، كەز كەلگەن جاعدايدا قوعامىمىزدا ەلەۋلى وزگەرىستەر بولادى. ءبىزدىڭ قوعام قازىردىڭ وزىندە باسقاشا. ءبىر جىل بۇرىنعىمەن سالىستىرعاندا قازىر ادامدار وتباسىنداعى زورلىق-زومبىلىق فاكتىلەرىن باسقاشا قابىلدايدى. پروبلەمالار بولعاندا، قازىر ادامدار ۇندەمەي وتىرمايدى، ايەلدەر شاعىمدارىن ايتىپ جاتىر. قازىر ايەلدەر ءوز نارازىلىقتارىن ءبىلدىرىپ، بۇل تۋرالى اشىق ايتىپ، قوعام ولاردى قولداپ جاتىر»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، قازىر ەلدە بارلىعى قۋاندىق بيشىمبايەۆقا قاتىستى سوتتىڭ وبەكتيۆتى، ءادىل جانە زاڭدى وتۋىنە ەرەكشە نازار اۋدارىپ وتىر.
«الداعى سوت شەشىمى ءادىل، وبەكتيۆتى جانە زاڭدى بولاتىنىنا كۇمانىم جوق. وسى پروتسەستى جۇرگىزىپ جاتقان جوعارعى سوت باسشىلىعى، سۋديالار قوعام مەن حالىق الدىنداعى جاۋاپكەرشىلىگىن تۇسىنەدى دەپ ويلايمىن. وسى جاعدايدا بىرەۋلەر قانداي دا ءبىر مانيپۋلياتسياعا تۇسەدى دەپ ويلامايمىن. سوندىقتان جۋرناليستەر دە جاعدايدى سابىرمەن قابىلداعانى ءجون. قازىر بارلىعى دا پروتسەستىڭ وبەكتيۆتى، ءادىل جانە زاڭدى وتۋىنە مۇددەلى»، - دەدى سەنات ءتوراعاسى.
ايتا كەتەيىك، ايەلىن ءولتىردى دەپ ايىپتالعان ق. بيشىمبايەۆتىڭ باستى سوتى 27 -ناۋرىزعا بەلگىلەندى. سوت القابيلەر قاتىسۋىمەن وتەدى.
اۆتور
رۋسلان عابباسوۆ
