بيشىمبايەۆ ءىسى: بايجانوۆ 4 جىلعا سوتتالدى

Бақытжан Байжанов
Коллаж: Kazinform

 استانا. KAZINFORM - قۋاندىق بيشىمبايەۆتىڭ قىلمىسىن جاسىردى دەپ ايىپتالعان ەكس-ءمينيستردىڭ ءىنىسى باقىتجان بايجانوۆ سوت ۇكىمىمەن 4 جىلعا سوتتالدى.

ول سوت پروتسەسى باستالعاننان بەرى ءوزىنىڭ كىناسىز ەكەنىن ايتىپ، مارقۇم سالتانات نۇكەنوۆانىڭ تۋىستارىنان بىرنەشە رەت كەشىرىم سۇراعان بولاتىن.

«سالتانات قورىلداپ ۇيىقتاپ جاتتى. جامان وي كەلمەدى. جەدەل جاردەم شاقىرىپ، دابىل قاعۋىم كەرەك ەدى. وسى سۇمدىق وقيعادان قابىرعاسى قايىسىپ وتىرعاندارعا شىن جۇرەگىممەن جانىم اشيدى. سالتاناتتىڭ تۋعان-تۋىستارىنا كوڭىل ايتامىن. ماعان سەنبەيتىن شىعارسىزدار. ءبىراق جۇرەگىم اۋىرىپ، قايعىرامىن. سەبەبى، سالتاناتتى وتە جاقسى قىرىنان تانيتىنمىن. مەن بارىنەن كەشىرىم سۇرايمىن. ەڭ ءبىرىنشى، سالتاناتتىڭ تۋىستارىنان، دوستارىنان، ءوزىمنىڭ اتا-انامنان، جۇبايىم مەن بالالارىمنان كەشىرىم سۇرايمىن. مەن جاۋاپكەرشىلىكتى تولىقتاي موينىما الامىن. سول قايعىلى كۇنى جاعدايدى تولىق ءتۇسىنىپ، باعامداي الماعانىم ءۇشىن وكىنەمىن»، - دەگەن ەدى بايجانوۆ الدىڭعى سوت پروتسەستەرىنىڭ بىرىندە.

ءتىپتى، سالتاناتتىڭ اعاسى قايرات نۇكەنوۆ بايجانوۆتى كەشىرۋگە دايىن ەكەنىن ايتقان ەدى.

«ول تەك اعاسىنىڭ كەسىرىنەن تەرگەلىپ جاتىر. ونىڭ بالالارى بارىن بىلەمىز. ايەلى، اكە- شەشەسى بار. اكە-شەشەسىمەن كەزدەستىك. وتە جاقسى وتباسى. ماعان سولاي كورىندى. بايجانوۆ بيشىمبايەۆ سياقتى ەمەس. ول ءبارىن سونىڭ ىقپالىمەن ىستەگەن. ول سوتتا شىن جاۋاپ بەرسە، ءبىز دە ادامبىز عوي، كەشىرۋگە دايىنبىز»، - دەگەن ەدى قايرات نۇكەنوۆ.

دەسە دە، كەيىنگى سوت پروتسەسىندە بايجانوۆتىڭ كەيبىر سوزدەرى، ارەكەتى ءبىر- بىرىمەن قابىسپاي، سالتاناتتىڭ تۋىستارى ودان تەرىس بۇرىلدى.

باقىتجان بايجانوۆ سوتتاعى سوڭعى سوزىندە سالتاناتتىڭ ءولىمىن جاسىرۋ بىلاي تۇرسىن، ءولىم اۋزىندا جاتقانىن بىلمەگەنىن العا تارتتى.

«ءيا، قىزمەتكەرلەردى ۇيلەرىنە قايتارىپ، مەيرامحانانى جاۋىپ، بەينەجازبالاردى ءوشىرۋدى بۇيىرعانىمدى جاسىرمايمىن. ءبىراق مەن سول كەزدە اۋىر قىلمىس جاسالعانىن ءبىلدىم بە؟ انت ەتەمىن. بىلمەدىم. ەگەر بىلگەندە قىلمىستى جاسىرۋ ارەكەتتەرىنىڭ ەشقايسىسىن جاسامايتىن ەدىم. سالتاناتتىڭ تۋعان-تۋىستارىنان تاعى دا كەشىرىم سۇرايمىن. جاتقان جەرى جايلى بولسىن»، - دەگەن ەدى ول.

ەستەرىڭىزگە سالساق، 29-ساۋىردە پروكۋرور ساياحات نۇربەكوۆ ايىپتاۋشى تاراپ بايجانوۆقا قىلمىستىق كودەكستىڭ 434-بابى - «قىلمىس تۋرالى حابارلاماۋ» بويىنشا جارتىلاي ايىپ تاعۋدان باس تارتىپ، وعان قاتىستى قىلمىستىق ءىستى قاراۋدى جالعاستىرۋ قاجەت دەپ سانايتىنىن ايتقان ەدى. ءسويتىپ، بايجانوۆقا قىلمىستىق كودەكستىڭ 432-بابىنا سايكەس، اسا اۋىر قىلمىستى «جاسىرۋ» بويىنشا قىلمىستىق ءىس قوزعالدى.

سوت پروتسەستەرىنىڭ بىرىندە بايجانوۆ شىندىق دەتەكتورىنان وتكىسى كەلەتىنىن ايتقان بولاتىن.

سوڭعى جاڭالىقتار