بيشىمبايەۆ ءىسى: ب ا ق وكىلدەرىنىڭ سوت زالىنا كىرۋىنە قايتا رۇقسات بەرىلدى

استانا. KAZINFORM - ەلوردادا ءوتىپ جاتقان ەكس-شەنەۋنىك قۋاندىق بيشىمبايەۆتىڭ ىسىنە قاتىستى سوت وتىرىسىنا جۋراليستەر قايتادان تىكەلەي قاتىسا الاتىن بولدى.

«القا بيلەردى سوت وتىرىسى زالىنا شاقىرماس بۇرىن، تەكسەرۋ ناتيجەسىندە انىقتالعانداي ولاردىڭ فوتولارى مەن ۆيدەوسىن ب ا ق-تا جاريالاعان ك ت ك ارناسىنىڭ وكىلدەرى اكىمشىلىك جاۋاپكەرشىلىككە تارتىلدى. اكىمشىلىك جازا ەسكەرتۋ تۇرىندە قولدانىلدى»، - دەدى سۋديا ايجان قۇلبايەۆا.

سونداي-اق، سۋديا جۋرناليستەردى سوت زالىنا كىرگىزۋگە رۇقساتتى داۋىسقا سالدى، ق. بيشىمبايەۆ پەن ونىڭ قورعاۋشىلارى قارسى شىقتى، قالعان جاق قارسىلىق تانىتپادى. وسىلايشا سۋديا 10 مينۋتقا ءۇزىلىس جاريالادى.

«سوت پروتسەسىنىڭ اشىق ءوتىپ جاتقانىن ەسكەرە وتىرىپ، قىلمىستىق ءىس جۇرگىزۋ كودەكسىنىڭ 29-بابىندا بەكىتىلگەن ءىس جۇرگىزۋ سوتىنىڭ جاريالىلىق قاعيداتىن قامتاماسىز ەتۋ جانە ءادىل سوت تالقىلاۋى ماقساتىندا سوت بۇقارالىق اقپارات قۇرالدارىنىڭ وكىلدەرىن سوت زالىنا كىرۋىنە رۇقسات بەرۋ قاجەت دەپ سانايدى. سونداي-اق، ك ت ك ارناسى دا سوت زالىنا جول بەرىلەدى، ويتكەنى بۇعان دەيىن ولارعا قاتىستى اكىمشىلىك جاۋاپكەرشىلىك قولدانىلدى»، - دەيدى سۋديا.

ەسكە سالا كەتسەك، سوتتىڭ تىيىم سالۋىنا قاراماستان، ب ا ق-تا جانە الەۋمەتتىك جەلىلەردە القا بيلەردىڭ بەت-الپەتى بەينەلەنگەن ۆيدەو پايدا بولعان ەدى. سودان كەيىن سوت ب ا ق وكىلدەرىن سوت زالىنا كىرگىزبەۋ تۋرالى شەشىم قابىلدادى.

ايتا كەتەيىك، ايىپتالۋشى قۋاندىق بيشىمبايەۆ سوتقا ۇيالى تەلەفونىنىڭ پارولىن بەرۋدەن باس تارتتى. ونى تەك قورعاۋشىلارىنا ۇسىنا الاتىنىن ايتقان ەدى.

ەسكە سالا كەتەتىن تاعى ءبىر جايت، جوعارعى سوت بيشىمبايەۆ پەن بايجانوۆتىڭ ءىسىن جۇرگىزگەن سۋديا ايجان قۇلبايەۆاعا بەلگىسىز نومىردەن قوڭىراۋلار مەن قورقىتۋ حابارلامالارى تۇسكەنىن مالىمدەگەن ەدى.

استانا قالاسىنىڭ پوليتسيا دەپارتامەنتى سۋديا ا. قۇلبايەۆاعا قاتىستى قورقىتۋ فاكتىسى بويىنشا قىلمىستىق ءىس قوزعادى.

اۆتور
داۋلەت ىزتىلەۋ