بىشكەكتەگى كەمەل توقايەۆ وقىعان مەكتەپكە جازۋشىنىڭ ەسىمى بەرىلەتىن بولدى
استانا. KAZINFORM - بىشكەكتەگى 33-مەكتەپكە ءبىلىم وشاعىنىڭ تۇلەگى كەمەل توقايەۆتىڭ ەسىمى بەرىلەتىن بولدى، دەپ حابارلايدى «كاكتۋس. مەديا».
بۇل تۋرالى قىرعىز رەسپۋبليكاسى پرەزيدەنتىنىڭ كەڭەسشىسى اسلان كويچيەۆ Facebook-تەگى پاراقشاسىندا جازدى.
- پرەزيدەنت سادىر جاپاروۆتىڭ باستاماسىمەن قازاقستان پرەزيدەنتى قاسىم-جومارت توقايەۆتىڭ اكەسى كەمەل توقايەۆتىڭ ەسىمى بىشكەكتەگى مەكتەپ-گيمنازياعا بەرىلدى. كەمەل توقايەۆ - 1923 -جىلدىڭ 2-قازانىندا الماتى وبلىسىنىڭ قاراتال اۋدانىندا تۋعان. قازاق جازۋشىسى، قازاق پروزاسىنداعى دەتەكتيۆ جانرىنىڭ نەگىزىن قالاۋشى، - دەپ جازدى ول.
سادىر جاپاروۆتىڭ كەڭەسشىسى كەمەل توقايەۆ پەن اتالعان مەكتەپتى نە بايلانىستىراتىنىن بىلايشا تۇسىندىرەدى.
- ۇجىمداستىرۋ جىلدارىندا جانە سونىڭ سوڭىن الا كەلگەن اشارشىلىق كەزەڭىندە كەمەل توقايەۆتىڭ وتباسى تۋعان وتانىن تاستاپ، قونىس اۋدارۋعا ءماجبۇر بولعان جانە بىرنەشە جىل سول فرۋنزە قالاسىندا (قازىرگى بىشكەك - رەد. ) تۇرعان. كەمەل توقايەۆ وسى جەردە وتباسىنان ايىرىلدى. جەتىمدەر ۇيىندە تاربيە الدى. ۇلى وتان سوعىسى جىلدارىندا تاعدىر ونى ەكىنشى مارتە قىرعىزستانعا كەلتىردى. فرۋنزە قالاسىنداعى جاياۋ اسكەر ۋچيليشەسىندە (قازىرگى 33-مەكتەپ- گيمنازيا) ءبىلىم الىپ، سول جەردەن مايدانعا شاقىرتىلدى، - دەيدى اسلان كويچيەۆ.
سونىمەن قاتار، ول قازاقستان پرەزيدەنتى اكەسى وقىعان مەكتەپكە اۆتوبۋس سىيلاعانىن ەسكە سالادى.
- ول جاۋىنگەرلىك ەرلىگى ءۇشىن «سوۆەت وداعىنىڭ باتىرى» اتاعىنا ۇسىنىلدى. ءبىراق قاندايدا ءبىر سەبەپتەرمەن ول اتاق بۇيىرمادى. جۋىقتا قاسىم-جومارت توقايەۆ 33-مەكتەپ- گيمنازياعا اۆتوبۋس سىيلادى. بۇل سىيلىق سوعىس قاھارماندارىنا، اكەسى وقىعان مەكتەپكە قۇرمەت بەلگىسى رەتىندە تابىستالدى. سونداي-اق، وسى مەكتەپتىڭ ۇزدىك تۇلەكتەرىنە الماتىداعى ق. ساتبايەۆ ۋنيۆەرسيتەتىنەن اقىسىز وقۋ ءۇشىن ءۇش ورىن بەرىلەتىنى ءمالىم بولىپ وتىر، - دەيدى قىرعىز رەسپۋبليكاسى پرەزيدەنتىنىڭ كەڭەسشىسى.
بۇعان دەيىن كەمەل توقايەۆتىڭ بىشكەكتەگى اۋىر بالالىق شاعى تۋرالى جازعان ەدىك.
اۆتور
ەسىمجان ناقتىباي
