بىشكەكتە ەكىنشى حالىق قۇرىلتايى وتەدى
قىرعىزستان استاناسىندا 15-16- جەلتوقسان كۇندەرى قىرعىز رەسپۋبليكاسىنىڭ پرەزيدەنتى سادىر جاپاروۆتىڭ قاتىسۋىمەن حالىق قۇرىلتايى وتەدى، دەپ حابارلايدى Kazinform.
مەملەكەت باسشىسى س. جاپاروۆ «حالىق قۇرىلتايىن وتكىزۋ تۋرالى» جارلىققا حالىق بيلىگىنىڭ ىرگەتاسىن ودان ءارى نىعايتۋ، ۇلتتىق سانانى دامىتۋ، اۋماقتىق ماسەلەلەردى شەشۋ، سونداي-اق ەلدىڭ تۇراقتى دامۋى ءۇشىن قول قويدى.
قىرعىز رەسپۋبليكاسىنىڭ مەملەكەتتىك حاتشىسى سۇيىنبەك قاسمامبەتوۆتىڭ ايتۋىنشا، حالىق قۇرىلتايى ناقتى ماسەلەلەردى شەشەتىن جانە جۇمىس جۇرگىزەتىن الاڭعا اينالادى.
حالىق قۇرىلتايىنا بيىل سايلانعان 700 دەلەگات قاتىسادى. ولاردىڭ قاتارىندا رەسپۋبليكانىڭ بارلىق ايماعىنان 640 ادام، ەتنوستاردان 30 وكىل، شەتەلدەگى ەڭبەك ميگرانتتارىنان 30 دەلەگات بار. سونىمەن قاتار جوگوركۋ كەنەش دەپۋتاتتارى، مينيسترلەر كابينەتىنىڭ مۇشەلەرى، مەملەكەتتىك ورگاندار مەن جەرگىلىكتى ءوزىن-ءوزى باسقارۋ ورگاندارىنىڭ وكىلدەرى دە قاتىسادى.
