بىشكەكتە كولبايەۆتىڭ ۇيىمداسقان قىلمىستىق توبىنىڭ تاعى ءبىر مۇشەسى ۇستالدى

بىشكەك. KAZINFORM - بىشكەكتە قامشى كولبايەۆتىڭ (قامشىبەك اسانبەك) ۇيىمداسقان قىلمىستىق توبىنىڭ دانيلا لاقاپ ەسىمدى مۇشەسى ۇستالدى، دەپ حابارلادى كابار اقپارات اگەنتتىگى.

پوليتسەيلەردىڭ مالىمەتىنشە، كۇدىكتىنىڭ قولىندا بەلگىسىز ماركالى قارۋ بولعانى تۋرالى اقپارات تۇسكەن. اتالعان فاكتى بويىنشا پەرۆومايسكي اۋداندىق ءى ءى ب تەرگەۋ قىزمەتى قىرعىز رەسپۋبليكاسى قىلمىستىق كودەكسىنىڭ 267-بابى (قارۋ، وق- دارىلەردى زاڭسىز ساتۋ) بويىنشا قىلمىستىق ءىس قوزعادى.

وسىلايشا، قامشى كولبايەۆتىڭ ۇيىمداسقان قىلمىستىق توبىنىڭ بەلسەندى مۇشەسى رەتىندە ىشكى ىستەر مينيسترلىگىندە تىركەلگەن كۇدىكتى س. د. انىقتالىپ، ۇستالدى. ول 1976 -جىلى تۋعان، لاقاپ اتى - دانيلا. ول تەرگەۋ قىزمەتىنە جەتكىزىلىپ، قىلمىستىق- پروتسەسسۋالدىق كودەكستىڭ 96-بابىنا سايكەس ۋاقىتشا ۇستاۋ اباقتىسىنا قامالدى.

پوليتسيا قىزمەتكەرلەرى كۇدىكتى س. د. -نىڭ بۇرىن ادام ۇرلاۋ جانە توناۋ ءۇشىن بىرنەشە رەت سوتتالعانىن انىقتادى. كەزىندە ول اسانبەك قامشىنىڭ جاقىن دا ادال سەرىكتەرىنىڭ ءبىرى، جۇرگىزۋشىسى، كۇزەتشىسى بولعان. ۇيىمداسقان قىلمىستىق توپتارعا قارسى جۇرگىزىلىپ جاتقان كۇرەسكە قاراماستان، ول قىلمىستىق ۇرىلار يدەولوگياسىن قولداۋدى جالعاستىردى، تۇرمەدەگى ادامداردى بەلسەندى تۇردە قارجىلاي جانە ازىق-تۇلىكپەن قامتاماسىز ەتتى.

قىلمىستىق ءىس اياسىنداعى جەدەل-ىزدەستىرۋ شارالارى بارىسىندا كۇدىكتىدەن ءنومىرى وشىرىلگەن 9 م م- لىك ماكاروۆ ماركالى قارۋ، 1 دانا وق- ءدارى جانە 8 پاترون تابىلىپ، تاركىلەندى.

ەسكە سالا كەتسەك، قىلمىس الەمىنىڭ سەركەسى قامشى اسانبەك (قامشىبەك كولبايەۆ) بىشكەكتە تۇتقىندالۋ كەزىندە كوزى جويىلدى.