بىشكەك مەكتەپتەرىندە ساباقتىڭ باستالۋ ۋاقىتى وزگەرۋى مۇمكىن

بىشكەك. KAZINFORM - قىرعىزستان استاناسىنىڭ اكىمدىگى جول-كولىك ينفراقۇرىلىمىنداعى كەپتەلىستەردى ازايتۋ جانە بالالاردىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ ماقساتىندا مەكتەپتەردە ساباقتىڭ باستالۋ ۋاقىتىن وزگەرتۋدى ۇسىنىپ وتىر.

مەكتەپتەردە ساباقتى 8:00-دەن ەرتە، ال كاسىپتىك ليتسەيلەر مەن جوعارى وقۋ ورىندارىندا ساعات 10:00-دە باستاۋ ۇسىنىلىپ وتىر. ءتيىستى قاۋلى جوباسى قوعامدىق تالقىلاۋعا شىعارىلدى.

مۋنيتسيپاليتەتتىڭ مالىمەتىنشە، ىشكى كوشى-قون اعىنىنىڭ كوپ بولۋىنا بايلانىستى قالاداعى بالالار سانى جىل سايىن ارتىپ كەلەدى. قازىرگى تاڭدا ەل استاناسىنىڭ 103 كوممۋنالدىق ءبىلىم بەرۋ مەكەمەسىندە 198129 بالا ءبىلىم الۋدا، ولاردىڭ جوبالىق قۋاتتىلىعى اۋىسىمىنا 89893 وقۋشى ورنىن قۇرايدى.

بۇدان بولەك، بىشكەكتە 129 كاسىپتىك ءبىلىم بەرۋ ۇيىمى بار، ونىڭ ىشىندە 36 جوعارى وقۋ ورنى، 77 ورتا كاسىپتىك وقۋ ورنى جانە 16 كاسىپتىك ليتسەيدە جالپى سانى 167727 وقۋشى بار.

اكىمدىكتىڭ حابارلاۋىنشا، قالا مەكتەپتەرى وقۋشىلارعا تولى، جولدار كولىكتەرگە شامادان تىس جۇكتەلىپ، ءبىلىم بەرۋ ۇيىمدارىندا ساباقتىڭ باستالۋى مەن اياقتالۋىنا سايكەس كەلەتىن ۋاقىت ارالىعىندا كەپتەلىس ورنايدى.

اۆتور
باقىتگۇل اباي قىزى