بىشكەك اۋەجايىنان بومبا تابىلمادى، حابارلاما جالعان بولىپ شىقتى

استانا. KAZINFORM - بىشكەكتە «ماناس» حالىقارالىق اۋەجايىنا بومبا قويىلعانى تۋرالى اقپارات راستالمادى، اۋە تەرمينالى قالىپتى رەجيمدە جۇمىس ىستەپ تۇر. بۇل تۋرالى شۋ وبلىسى بويىنشا ءى ءى ب حابار تاراتتى.

ۆەدومستۆونىڭ ايتۋىنشا، 22-مامىردا ساعات 13.50 دە كەزەكشى بولىمگە، ساعات 13.12 دە «ماناس» اۋەجايىنىڭ ەلەكتروندى پوشتاسىنا «باباح 15.00 دە» دەگەن ماتىنمەن حابارلاما كەلىپ تۇسكەن.

اتالعان فاكتى تىركەلىپ، تەرگەۋگە دەيىنگى تەكسەرۋ باستالدى.

وقيعا ورنىنا شۋ وبلىسى ءى ءى ب، سوكۋلۋك اۋداندىق ىشكى ىستەر باسقارماسىنىڭ جەدەل-تەرگەۋ توبى جانە شۋ وبلىسى ءى ءى ب ارنايى كۇزەت قىزمەتىنىڭ قىزمەتكەرلەرى باردى. اۋماق دەرەۋ قورشاۋعا الىنىپ، قىزمەتكەرلەر مەن جولاۋشىلار ەۆاكۋاتسيالاندى.

پوليتسيا قىزمەتكەرلەرى ۇ ق ك قىزمەتكەرلەرىمەن بىرلەسىپ، قاجەتتى جەدەل-ىزدەستىرۋ شارالارىن جۇرگىزدى، ساپەرلەر توبى وقيعا ورنىندا ءتىنتۋ جۇرگىزىپ، ناتيجەسىندە فاكت راستالمادى.

ۇشاقتاردىڭ كەلۋى مەن كەتۋىندە ەشقانداي كىدىرىس بولعان جوق، قازىر قورشاۋ الىنىپ، اۋەجاي قالىپتى جۇمىس ىستەپ تۇر.

ەستەرىڭىزگە سالا كەتەيىك، بۇعان دەيىن بىشكەك اۋەجايىنداعى بومبا حابارلاماسىنا بايلانىستى ادامدار ەۆاكۋاتسيالانعانىن حابارلاعان ەدىك.