بيۋدجەتتەگى وزگەرىس: اۋىلدىڭ كىرىسى ءۇش ەسەگە ارتادى

استانا. KAZINFORM - بىرنەشە تولەم ءتۇرى اۋىل بيۋدجەتىنىڭ پايداسىنا اۋدارىلادى. بۇل تۋرالى ەلوردادا سەنات جانىنداعى ماسليحاتتارمەن ءوزارا ءىس-قيمىل جونىندەگى كەڭەستىڭ وتىرىسىندا پرەمەر-ءمينيستردىڭ ورىنباسارى ەرمەك كوشەربايەۆ ءمالىم ەتتى.

- اۋىلدىق وكرۋگتەر بيۋدجەتىنىڭ كىرىس كوزدەرى كەڭەيىپ كەلەدى. جاڭا بيۋدجەت كودەكسىنىڭ اياسىندا كەڭ تارالعان پايدالى قازبالار بويىنشا وسى قازبالاردى ءوندىرۋ سالىعى اۋدارىلدى. تولەمدەردىڭ تاعى 4 ءتۇرىن اۋدارۋ جوسپارلانعان. بۇل تۇرعىدا زاڭدى تۇلعالار مەن جەكە كاسىپكەرلەر مۇلكىنە سالىناتىن سالىق، سۋ رەسۋرستارىن پايدالانعانى ءۇشىن تولەم، جەكەلەگەن قىزمەت تۇرلەرىمەن اينالىسۋ قۇقىعى ءۇشىن ليتسەنزيالىق الىم، ليتسەنزيانى پايدالانعانى ءۇشىن الىم ەسكەرىلگەن. وسى ورايدا اۋىلدىڭ كىرىسى ءۇش ەسەگە ارتادى، - دەدى ە. كوشەربايەۆ.

ونىڭ ايتۋىنشا، بيۋدجەت پروتسەستەرىن جەڭىلدەتۋ ءۇشىن اۋىلدىق وكرۋگتەردىڭ بيۋدجەتتىك باعدارلامالارىن 17 دەن 4 تۇرىنە دەيىن ىرىلەندىرۋ جوسپارلانعان. بۇل ءوز كەزەگىندە بيۋدجەتتىك تۇزەتۋلەردى 2 ايدان ءۇش كۇنگە دەيىن قىسقارتادى.

- ءبىزدىڭ ويىمىزشا، جاڭا بيۋدجەت كودەكسى قوعامنىڭ سۇرانىسىن قاناعاتتاندىرىپ، ۇنەمدى ءارى جاۋاپتى بيۋدجەت ساياساتىن جۇزەگە اسىرۋعا سەپتىگىن تيگىزەدى، - دەدى ۆيتسە- پرەمەر.

بۇدان بۇرىن حابارلانعانداي، بيىل اۋىلداردا مامانداردى باسپانامەن قامتاماسىز ەتۋگە 25 ميلليارد تەڭگە قاراستىرىلعان.