بيۋدجەت قاراجاتىن وڭدى-سولدى شاشۋدى دوعارۋ كەرەك - جولداۋ

استانا. KAZINFORM - ۇكىمەت بيۋدجەت تاپشىلىعىنىڭ ورنىن تولتىراتىن قارجى كوزىن تابۋ ءۇشىن ءتيىمدى كومپەنساتسيالىق تاسىلدەر ويلاستىرۋى قاجەت. بۇل تۋرالى قازاقستان حالقىنا جولداۋىن جاريالاۋ كەزىندە مەملەكەت باسشىسى قاسىم-جومارت توقايەۆ ايتتى.

«مەملەكەت قارجىسىنىڭ تۇراقتىلىعىن قامتاماسىز ەتۋدىڭ بىردەن ءبىر جولى - كورپەگە قاراي كوسىلۋ. سوندىقتان بيۋدجەت قاراجاتىن ستراتەگيالىق ماڭىزى جوق، اسا شۇعىل ەمەس شارۋالارعا وڭدى-سولدى شاشۋدى دوعارۋ كەرەك»، - دەدى قاسىم-جومارت توقايەۆ.

پرەزيدەنتتىڭ ايتۋىنشا، بيۋدجەتارالىق قارىم-قاتىناستى دا رەتكە كەلتىرۋ قاجەت.

«شاعىن جانە ورتا بيزنەستەن تۇسەتىن سالىقتى ايماقتاردىڭ وزىندە قالدىرۋ دۇرىس ءارى ۋاقتىلى قابىلدانعان شەشىم بولدى. بۇل قادام كاسىپكەرلىكتىڭ دامۋىنا ەداۋىر سەرپىن بەردى. سونىمەن قاتار اكىمدەردىڭ دەربەستىگىن ارتتىردى. الايدا كەيبىر اكىمدەر قوسىمشا كىرىس كوزىنە يە بولعان سوڭ، ونى ەلگە پايداسىز ىسكە شاشىپ، ءتيىمسىز جۇمسايتىن بولدى. اسا ماڭىزدى ەمەس مىندەتتەر مەن جوبالارعا قارجى بولە باستادى. ۇكىمەت بيۋدجەت تاپشىلىعىنىڭ ورنىن تولتىراتىن قارجى كوزىن تابۋ ءۇشىن ءتيىمدى كومپەنساتسيالىق تاسىلدەر ويلاستىرۋى قاجەت»، - دەدى پرەزيدەنت.

اۆتور
رۋسلان عابباسوۆ