بيداي ەگۋ ازايىپ، تيىمدىلىگى جوعارى داقىلدار اۋماعى ارتادى - اۋىل شارۋاشىلىعى ءمينيسترى

استانا. KAZINFORM - بيىل ەلىمىزدە اۋىل شارۋاشىلىعى داقىلدارى ەگىلەتىن اۋماق بىلتىرعى جىلعا قاراعاندا 518 مىڭ گەكتارعا ارتادى. بۇل تۋرالى ۇكىمەت وتىرىسىندا ا ش م باسشىسى ايداربەك ساپاروۆ ايتتى.

- اۋىل شارۋاشىلىعى جالپى ءونىمىن 2 ەسەگە ۇلعايتۋ بويىنشا جول كارتاسىنا سايكەس بيىل دا ەگىس القاپتارىن ءارتاراپتاندىرۋ جۇمىسى جالعاساتىن بولادى. بارلىق ينديكاتور اكىمدىكتەرگە جەتكىزىلدى. جالپى، اۋىل شارۋاشىلىعى داقىلدارىن 23,8 ميلليون گەكتار جەرگە ورنالاستىرۋ جوسپارلانىپ وتىر. 
بۇل وتكەن جىلدىڭ دەڭگەيىنەن 518 مىڭ گەكتارعا كوپ، - دەدى ول.

ونىڭ ايتۋىنشا، بيىل ءارتاراپتاندىرۋ باعدارلاماسى 1 ميلليون گەكتارعا جۋىق القاپتى قامتيدى.

- وسىلايشا، رەنتابەلدىلىگى جوعارى داقىلداردىڭ اۋماعى 750 مىڭ گەكتارعا ارتاتىن بولادى، ونىڭ ىشىندە مايلى داقىلدار الاڭى 365 مىڭ گەكتارعا، ازىقتىق داقىلدار - 184 مىڭ گەكتارعا، ارپا - 114 مىڭ گەكتارعا، قاراقۇمىق - 41,5 مىڭ گەكتارعا، كارتوپ - 15 مىڭ گەكتارعا ۇلعايادى. بۇل رەتتە بيداي مونوداقىلىنان باسقا داقىلعا اۋىسۋ بويىنشا اۋقىمدى جۇمىس جالعاسىپ جاتىر. 2 جىل ىشىندە بيداي الاڭى 730 مىڭ گەكتارعا، سونىڭ ىشىندە بيىل 159 مىڭ گەكتارعا قىسقاردى، - دەدى مينيستر.

ۆەدومستۆو باسشىسى قازىرگى ۋاقىتتا مايلى داقىلدار مەن بۇرشاق داقىلدارى ىشكى جانە سىرتقى نارىقتاردا سۇرانىسقا يە جانە ولاردىڭ باعاسى تۇراقتى جوعارى دەڭگەيدە ەكەنىن ايتتى.

- ماسەلەن، بيدايدىڭ ورتاشا باعاسى تونناسىنا 65-70 مىڭ تەڭگە بولسا، زىعىر جانە راپس سياقتى ەكسپورتقا باعىتتالعان داقىلداردىڭ باعاسى 200 مىڭعا دەيىن بارادى جانە ودان دا جوعارى، - دەدى ايداربەك ساپاروۆ.

ەسكە سالساق قازاقستان 2025 -جىلى گرۋزياعا 80 مىڭ توننا بيداي ەكسپورتتايدى.