بەيبىت شۇمەنوۆكە قاتىستى قىلمىستىق ءىس جابىلدى – ءى ءى م

استانا. KAZINFORM - قازاقستاندىق بوكسشى بەيبىت شۇمەنوۆكە جاريالانعان مەملەكەتارالىق ىزدەۋ كۇشىن جويدى. Kazinform اگەنتتىگى ءىستىڭ ءمان-جايىن ىشكى ىستەر مينيسترلىگىنەن سۇراعان ەدى.

بەيبىت شۇمەنوۆكە قاتىستى استانا قالاسى ەسىل اۋدانىنىڭ پوليتسيا باسقارماسى قىلمىستىق كودەكستىڭ 293-بابى 2-بولىگى 2-تارماعىنا سايكەس سوتقا دەيىنگى تەرگەپ-تەكسەرۋ جۇرگىزدى.

«قازىرگى ۋاقىتتا تەرگەۋ ناتيجەسى بويىنشا جانە جابىرلەنۋشىلەردەن كەلىپ تۇسكەن كەشىرىم بەرۋ ارىزى نەگىزىندە بەيبىت شۇمەنوۆكە قاتىستى قىلمىستىق ءىس جانە قىلمىستىق قۋدالاۋ تاراپتاردىڭ تاتۋلاسۋىنا بايلانىستى قىسقارتىلدى. ق ر قىلمىستىق كودەكسىنىڭ 68-بابى 1-بولىگىنە سايكەس، قازاعا ۇشىراتۋمەن بايلانىستى ەمەس جانە ونشا اۋىر ەمەس نەمەسە اۋىرلىعى ورتاشا قىلمىس جاساعان ادام جابىرلەنۋشىمەن، ارىز بەرۋشىمەن تاتۋلاسسا، ونىڭ ىشىندە مەدياتسيا تارتىبىمەن تاتۋلاسسا، سونداي-اق كەلگەن زالالدى وتەسە، قىلمىستىق جاۋاپكەرشىلىكتەن بوساتىلادى»، - دەلىنگەن اگەنتتىك جولداعان ساۋالدىڭ جاۋابىندا.

سونداي-اق، ىشكى ىستەر مينيسترلىگى وزگە اقپاراتتىڭ جاريا ەتۋگە جاتپايتىنىن جانە تەرگەۋ ناتيجەسىمەن قىلمىستىق پروتسەسكە قاتىسۋشىلار عانا تانىسۋعا قۇقىلى ەكەنىن حابارلادى.

ەسكە سالساق، 2023-جىلى شىلدەدە قازاقستاندىق بوكسشى بەيبىت شۇمەنوۆ كوپشىلىك ورىندا بالاسى بار ەر ادامعا جۇدىرىق الا جۇگىرگەن ەدى.

كەيىن بەيبىت شۇمەنوۆ ءدامحاناداعى وقيعانىڭ قالاي بولعانىن ايتىپ بەردى.

وعان مەملەكەتارالىق ىزدەۋ جاريالاندى.

بىلتىر قاراشادا ءى ءى م حالىقارالىق ىزدەۋ جاريالانعان بەيبىت شۇمەنوۆكە قاتىستى تەرگەۋدىڭ توقتاپ تۇرعانىن حابارلاعان ەدى.