بيبىگۇل جەكسەنباي اقپاراتتىق قاۋىپسىزدىك سالاسىنداعى پروبلەمانى اتادى

ءبىز ەلىمىزدىڭ قورعانىس سالاسىنا قىرۋار قارجى بولەمىز. ال اقپاراتتىق قاۋىپسىزدىك ماسەلەسى شەشىلمەگەن، قورعانىسقا قانشا قارجى بولسەك تە، ونىڭ ەشقانداي پايداسى بولمايدى. بۇگىن سەناتتىڭ وتىرىسىندا دەپۋتات بيبىگۇل جەكسەنباي وسىنداي پىكىر ءبىلدىردى، دەپ حابارلايدى Kazinform.

دەپۋتات سيفرلىق حابار تاراتۋ تەلەديدارىن ەنگىزۋ ماسەلەلەرىنە نازار اۋداردى. قازاقستاندا تىركەلگەن 83 تەلەراديوكومپانيانىڭ 21 ى رەسپۋبليكالىق دەڭگەيدە حابار تاراتادى. ونىڭ تەك 15 ى مۋلتيپلەكسكە تەگىن ەنىپ، قىزمەت ەتىپ ءجۇر. ال قازاقستاندىق كورەرمەندەرگە ۇسىنىلعان شەتەلدىك تەلەارنالار سانى 300 گە جۋىقتادى. جوسپار بويىنشا 2015 -جىلى بۇكىل ەلىمىز اۋماعى سيفرلى ەفيرلىك تەلەديدارعا كوشۋ ەسكەرىلگەن، ءبىراق جوبا 10 جىلعا ۇزارتىلدى.

سەناتوردىڭ ايتۋىنشا، سيفرلىق تەحنولوگيالاردىڭ ارقاسىندا وبلىس ورتالىقتارىندا 30 عا دەيىن، شالعايداعى ەلدى مەكەندەردە 15 ارناعا دەيىن حابار تاراتۋعا بولادى.

«ازىرگە، مەملەكەتتىك ارنالاردان وزگەلەرى ءۇشىن مۋلتيپلەكستە حابار تاراتۋ ارمان بولىپ وتىر. وڭىرلىك، شەكارالىق اۋماقتاعى جەكەمەنشىك تەلەارنالار ودان ورىن الا المايدى. سەبەبى باعاسى ۋداي قىمبات. ياعني، جەكەمەنشىك ارنالاردىڭ دامۋىنا ءوزىمىز كەدەرگى جاساپ وتىرمىز»، - دەدى ب. جەكسەنباي.

دەپۋتاتتىڭ پىكىرىنشە، وسى ارادا وزەكتى ماسەلە بايقالىپ وتىر. بۇل اقپاراتتىق قاۋىپسىزدىك ماسەلەسى. شەكارالاس ەلدى مەكەندەردە شەتەلدىك اقپارات كوزى ۇيرەنشىكتى بولعان. مەملەكەتتىك تەلەارنالاردى قارامايتىن كورەرمەندەر قازاقستانمەن شەكارالاس مەملەكەتتەردىڭ تەلەارنالارىن كۇندىز- ءتۇنى كورىپ، جات ەلدىڭ يدەولوگياسىن ساناسىنا ءسىڭىرىپ جاتىر.

سەناتور كورشى ەلدەردىڭ يدەولوگياسى «سۇر» تاباقشالار ارقىلى جاس ۇرپاقتىڭ ساناسىنا ەركىن اسەر ەتەتىنىن اتاپ ءوتتى.

«اقپاراتتىق قاۋىپسىزدىك ماسەلەسىنە دۇرىستاپ نازار اۋداراتىن كەز كەلدى. قازىر سيفرلى ەفيرلىك تەلەديداردى قازاقستان حالقىنىڭ 92,66 پايىزى كورە الادى. الايدا، ەلىمىز سيفرلى حابار تاراتۋعا كوشكەنىمەن، وڭىرلەردەگى جەكەمەنشىك تەلەارنالار بۇرىنعى بەيشارا كۇيىندە قالىپ وتىر. اقپارات تاراتاتىن تەلەارنا دامىماسا، يدەولوگيا دا بولمايدى. يدەولوگيا دەگەنىمىز تەك استانا، الماتىدا عانا ەمەس، كۇللى وڭىرلەردە جۇرگىزىلۋى ءتيىس»، - دەدى دەپۋتات.

بيبيگۇل جەكسەنباي جەكە ارنالارعا مۋلتيپلەكستىڭ باعاسىن تومەندەتۋدى جانە شەكارا ماڭىنداعى ەلدى مەكەندەردەگى وتاندىق تەلەارنالاردىڭ ءتىزىمىن كەڭەيتۋدى ۇسىندى.