ديماشقا دەگەن قۇرمەت: پولشادا ءانشىنى قارسى الۋعا 10 نان اسا ەلدىڭ جانكۇيەرى كەلدى
استانا. قازاقپارات – 16-قازاندا قازاقستاننىڭ حالىق ءارتىسى ديماش قۇدايبەرگەن شىعارماشىلىق ۇجىمىمەن بىرگە پولشانىڭ كراكوۆ قالاسىنا كەلدى، دەپ حابارلايدى dimashnews.
الداعى جەكسەنبىدە ءدال وسى قالادا ونەرپازدىڭ جاڭا DiMENSIONS كونسەرتتىك تۋرنەسىنىڭ شىمىلدىعى تۇرىلەدى.
پولشا ديماشتى العاش رەت قارسى الىپ وتىر. اۋەجايعا ءانشىنى قارسى الۋ ءۇشىن ونىڭ پولشالىق فان-كلۋبىنىڭ مۇشەلەرى مەن كونسەرتكە ارنايى كەلگەن وزگە ەلدەردەگى جانكۇيەرلەرى جينالدى.
شىعارماشىلىق بەلسەندىلىگىمەن ەرەكشەلەنەتىن پولشالىق Dears جانكۇيەرلەرى ونەرپازعا ارناپ ەرەكشە قارسى الۋ باعدارلاماسىن ۇيىمداستىردى. «Skalne Orły» وركەسترى قازاقستاندىق ءانشىنى پولشانىڭ ءداستۇرلى مۋزىكالىق تۋىندىلارىن ورىنداپ قارسى الىپ الدى. ولاردىڭ قاتارىندا «Hej bystra woda» ،«Szła dzieweczka» اندەرى مەن پودحالە ءوڭىرىنىڭ حالىق اندەرى دە بولدى.
اۋەجايدا ىلىنگەن كوركەم بەزەندىرىلگەن باننەرلەر، ءتۇرلى ەلدەردىڭ تۋلارى جانە پولشالىق فان-كلۋبتىڭ لوگوتيپى بەينەلەنگەن كيىمدەر كوپشىلىكتىڭ سۇيىكتى ونەرپازىن ەرەكشە ىقىلاسپەن كۇتكەنىن اڭعارتىپ، جىلى ءارى دوستىق اتموسفەرا قالىپتاستىردى.
جانكۇيەرلەر ديماشتى پولياك حالقىنىڭ ءداستۇرلى قوناقجايلىق بەلگىسى سانالاتىن نان مەن تۇز ۇسىنۋ راسىمىمەن قارسى الدى.
بۇگىن اۋەجايعا پولشا، قازاقستان، فرانسيا، رۋمىنيا، يسپانيا، جاپونيا، يتاليا، كانادا، اۋستراليا، گەرمانيا جانە باسقا دا ەلدەردەن كەلگەن جانكۇيەرلەر جينالدى.
ال 18-قازاندا كراكوۆ قالاسىنداعى TAURON Arena ساحناسىندا ديماش قۇدايبەرگەننىڭ جاڭا DiMENSIONS كونسەرتتىك تۋرنەسىنىڭ سالتاناتتى اشىلۋى وتەدى.
بۇعان دەيىن ديماش قۇدايبەرگەن شەتەلدىكتەردىڭ قازاق مادەنيەتىنە قىزىعۋشىلىعى ارتقانىن ايتتى.
