بوزجىرا شاتقالىندا ۆيزيت ورتالىقتىڭ قۇرىلىسى اياقتالدى

ايتا كەتەيىك، بوزجىرا شاتقالى - الەم جۇرتشىلىعىن تامساندىراتىن ەرەكشە تابيعي مەكەندەردىڭ ءبىرى. سوندىقتان وڭىردە تۋريستەرگە قىزمەت كورسەتۋ ساپاسىن ارتتىرۋ جانە زاماناۋي ينفراقۇرىلىمدى دامىتۋ باعىتىندا كەشەندى جۇمىستار قولعا الىنعان.

مامانداردىڭ ايتۋىنشا، بۇگىندە شاتقال شەتەلدىك ساياحاتشىلار اراسىندا كەڭىنەن تانىمال. مۇندا يتاليا، فرانسيا، قىتاي، جاپونيا، تايلاند ەلدەرىنەن كەلگەن تۋريستەردى كوپ كەزدەستىرۋگە بولادى. ولاردى اسىرەسە ميلليونداعان جىلدار بويى جەل مەن سۋدىڭ اسەرىنەن قالىپتاسقان بورلى تاۋلار مەن ەرەكشە لاندشافت قىزىقتىرادى.

فرانسيانىڭ رەنن قالاسىنان كەلگەن تۋريست گۇلۆەن جۋگون سۇيىكتىسىمەن بىرگە ءۇش ايدان بەرى الەمدى ارالاپ ءجۇر. وزبەكستاننان كەيىن ماڭعىستاۋعا كەلگەن ولار بوزجىرا شاتقالىنان ەرەكشە اسەر العان.

- ماڭعىستاۋعا كەلگەنىمىزگە بەس كۇن بولدى. مۇنداعى حالىقتىڭ تۇرمىس دەڭگەيى جوعارى، ءوڭىر ەكونوميكاسى جاقسى دامىعان. قىزمەت كورسەتۋ سالاسى مەن قوناق ۇيلەر دە جاقسى دەڭگەيدە. ال تابيعاتى ءتىپتى تاڭعاجايىپ. بوزجىرا - ءوز الدىنا بولەك الەم، ناعىز كارتينا ىسپەتتى، - دەيدى فرانسۋيالىق تۋريست گۇلۆەن جۋگون.

ال استانا قالاسىنان ارنايى كەلگەن تۋريست دينارا تولەمىسوۆا دا شاتقالدىڭ سۇلۋلىعىنا ءتانتى بولعانىن ايتادى.

- اتاقتى بوزجىرا شاتقالىن كورۋ ءۇشىن ارنايى كەلدىم. راسىندا دا، وتە ادەمى جەر. ماڭعىستاۋ قاسيەتتى ورىندار مەن ەرەكشە لاندشافتى ايماقتارعا باي ءوڭىر ەكەن. قۇربىم ەكەۋمىز ءۇش كۇننەن بەرى تاريحي جەرلەر مەن تابيعاتتى تاماشالاپ كەلەمىز، - دەيدى استانالىق تۋريست.

بوزجىرا شاتقاتىندا تۋريستەرگە جاعداي جاساۋ ءۇشىن العاشقى ۆيزيت ورتالىقتىڭ قۇرىلىسى اياقتالدى. جوبا جەتەكشىسى اسەت ءشامبىلوۆتىڭ ايتۋىنشا، اباتتاندىرۋ جۇمىستارىن اياقتاپ، ورتالىقتى وسى ايدا ىسكە قوسۋ جوسپاردا.

- بۇل جەردە تۋريستەرگە باعىت-باعدار بەرىلەدى. بىلەسىزدەر، بوزجىرا شاتقالى ورنالاسقان اۋماق كەزىندە مۇحيتتىڭ ءتۇبى بولعان. اكۋلالاردىڭ تىستەرىن قويىپ، شاعىن مۇراجاي جاسايمىز. سونىمەن قاتار، تاماقتانۋعا دا بولادى. كۇنىنە 50 - 60 ادامعا قىزمەت كورسەتە الامىز. ورتالىق شاتقالدان 18 شاقىرىم قاشىقتىقتا، نەگىزگى جولدىڭ بويىندا ورنالاسقان، - دەيدى جوبا جەتەكشىسى اسەت ءشامبىلوۆ.

ماڭعىستاۋ وبلىستىق تۋريزم باسقارماسى باسشىسىنىڭ ورىنباسارى نۇرسۇلتان عينياتتىڭ مالىمەتىنشە، بوزجىرا شاتقالىندا تاعى ەكى جوبا جۇزەگە اسىرىلىپ جاتىر.

- بوزجىرا شاتقالىندا 2025 -جىلدان باستاپ 3 ينۆەستيتسيالىق جوبا ىسكە اسىرىلۋدا. كولەمى 3 ميللياردقا جۋىق ينۆەستيتسيا جۇمسالۋدا. جاڭادان الپىسقا جۋىق جۇمىس ورنى اشىلادى. ۇلكەن ۆيزيت ورتالىقتار، ەتنوكافەلەر مەن مەيرامحانالار اشۋ جوسپاردا. جالپى وبلىستا تۋريستەرگە قىزمەت كورسەتۋ سالاسى دامىپ كەلەدى. بىلتىر 20 ميللياردتان استام سومانىڭ قىزمەتى كوسەتىلدى، - دەيدى نۇرسۇلتان عينيات.

بىلتىر ماڭعىستاۋ وبلىسىنا 420 مىڭ تۋريست كەلگەن. ونىڭ 380 مىڭى - قازاقستان ازاماتتارى، ال 44 مىڭعا جۋىعى - شەتەلدىكتەر. مامانداردىڭ ايتۋىنشا، تۋريستەردىڭ باسىم بولىگى بوزجىرا شاتقالىن كورۋگە ارنايى بارادى.