بويىڭىزدا ادامدىق قاسيەت بولماسا، كاسىبي شەبەرلىگىڭىزدىڭ قۇنى كوك تيىن - ديماش

الەمگە ايگىلى ءانشى، قازاقستاننىڭ حالىق ءارتىسى ديماش قۇدايبەرگەن ستۋدەنتتەردىڭ شاقىرۋىمەن ەۋرازيا ۇلتتىق ۋنيۆەرسيتەتىنە باردى، دەپ حابارلايدى Kazinform.

ول وقۋ ورداسىمەن تانىسىپ، ءبىلىم الۋشىلارمەن كەزدەستى جانە ستۋدەنتتىك وركەسترمەن بىرگە تانىمال كۇيلەردى ورىندادى.

ديماش قۇدايبەرگەن ە ۇ ۋ-داعى كۇلتەگىن ەسكەرتكىشى جانە جازۋ تاريحى مۇراجايىمەن تانىستى.

ستۋدەنتتەرمەن كەزدەسۋدە ديماش قۇدايبەرگەن ءوزىنىڭ بالالىق شاعى، قالىپتاسۋى، وسكەن ورتاسى تۋرالى ايتىپ، سۇيىكتى كىتاپتارىمەن ءبولىستى، ومىرگە دەگەن جوسپارلارى، سپورتقا بەيىمدىلىگى تۋرالى سۇراقتارعا جاۋاپ بەردى.

ە ۇ ۋ جاستارى انشىدەن ءوزىنىڭ بويىنداعى ماڭىزدى ادامي قاسيەت - قاراپايىمدىلىقتى قالاي ساقتاۋعا بولاتىنىن سۇرادى.

«ءوز ىسىڭىزدە قانشالىقتى كاسىبي بولساڭىز دا، ەڭ باستىسى قاراپايىمدىلىق جانە رۋحاني باي بولۋ. بويىڭىزدا ادامدىق قاسيەت بولماسا، كاسىبي شەبەرلىگىڭىز قانشا جەردەن جوعارى دەڭگەيدە بولسىن، ونىڭ قۇنى كوك تيىن»، - دەپ اتاپ ءوتتى ءارتىس.

كەزدەسۋ بارىسىندا ديماش قۇدايبەرگەن مەن ەۋرازيا ۇلتتىق ۋنيۆەرسيتەتىنىڭ «دالا سازى» ستۋدەنتتىك وركەسترى يمپروۆيزالىق ونەرىمەن ءتانتى ەتتى. ولار دومبىرامەن قازاقتىڭ ايگىلى كۇيلەرىن ورىندادى.

«اتا-انامنىڭ وتاندىق مادەنيەتتەگى قىزمەتى مەنىڭ تاعدىرىمدى ايقىنداعانى ءسوزسىز. ومىردە جاقسى تالىمگەرلەردى كەزدەستىرۋ باقىتىنا يە بولدىم. قازاقستان رەسپۋبليكاسىنىڭ ەڭبەك سىڭىرگەن قايراتكەرى مارات ولجاباي ۇلى كەزىندە انامدى، كەيىن مەنى ۆوكال ونەرىنە باۋلىدى.

اتا-انام مەن ءۇشىن ءالى دە الاڭدايدى، مەن ءار باسقان قادامىمدى وتباسىمنىڭ، حالقىمنىڭ باتاسى مەن قولداۋىمەن جاسايمىن. 100 جاسقا كەلسەم دە، اتا-انامنىڭ وي-پىكىرىن، كوزقاراسىن قۇرمەتتەيتىن بولامىن»، - دەپ باستادى العاشقى جاۋابىن تانىمال ءانشى.

ءانشى جاستاردىڭ ءبىلىم مەن عىلىمداعى جەتىستىكتەرى تۋرالى كوپشىلىك اراسىندا اقپاراتتاندىرۋدىڭ ماڭىزدىلىعىنا نازار اۋداردى.

ديماش قۇدايبەرگەن ءوزىنىڭ سۇيىكتى كىتاپتارى تۋرالى دا ايتتى. اسىرەسە، مۇحتار اۋەزوۆتىڭ «اباي جولى» مەن چەرچيللدىڭ «ەشقاشان بەرىلمەڭىز» شىعارمالارىن ەرەكشە اتاپ ءوتتى.

«مەن 5 جاسىمنان باستاپ مۋزىكا مەكتەبىندە وقي باستادىم. سودان اجەم اياعى اۋىرعانىنا قاراماستان مەنى ارقاسىنا سالىپ مەكتەپكە الىپ باراتىن. مەن ونى قۋانتىپ، ونىڭ ماعان سالعان ەڭبەگى مەن جۇمساعان كۇش- جىگەرىن اقتاي بىلسەم، جۇرەكتە شىنايى باقىت پايدا بولادى»، - دەيدى جاس دارىن.

ءىس-شارا سوڭىندا ە ۇ ۋ باسشىلىعى حالىق ارتىسىنە قۇرمەت كورسەتىپ، قويىلعان سۇراقتارعا قىزىقتى جاۋاپتارى ءۇشىن العىس ءبىلدىردى جانە ۋنيۆەرسيتەتتىڭ جوعارى ماراپاتتارىنىڭ ءبىرى - كۇلتەگىن مەدالىن تابىس ەتتى.

سونداي-اق ۋنيۆەرسيتەتتىڭ بارلىق جاستار قاۋىمى اتىنان انشىگە ەستەلىك رەتىندە ج و و-نىڭ فيرمالىق جەمپىرى مەن ە ۇ ۋ ستۋدەنتى ءوز قولىمەن تىككەن ۇلتتىق شاپان تابىستالدى.

ديماش قۇدايبەرگەن ۋنيۆەرسيتەت ۇجىمىنا جىلى قارسى العاندارى ءۇشىن العىس ايتىپ، ستۋدەنتتەرگە وقۋدا تابىس تىلەدى.

اۆتور

اسحات رايقۇل