بوگەت سالۋعا كومەكتەسىپ، جۇرتتى ءتانتى قىلعان يت تۋرالى نە بىلەمىز

 اتىراۋ. KAZINFORM - اتىراۋلىق تۇرعىننىڭ ءيتى جايىق وزەنىنىڭ جاعالاۋىنا قۇم تولتىرىلعان قاپشىقتاردى تاسىپ ءجۇر.

اتىراۋ وبلىستىق جەدەل شتابتىڭ اقپاراتىنا قاراعاندا، ءيتتىڭ يەسى زامزاگۇل جاڭابايەۆا سارىتوعاي اۋىلىندا تۇرادى. ماحامبەت اۋدانىندا 21 ەلدى مەكەن بار. ال سارىتوعاي - جايىق وزەنىنە جاقىن ورنالاسقان 17 اۋىلدىڭ ءبىرى.

«بۇل ءيتتى كۇشىك كەزىنەن بەرى اسىراپ كەلەمىن. ونى ءۇش جىل بۇرىن العان ەدىم. ءبىر- بىرىمىزگە ۇيرەنىپ قالدىق. پشون دەپ اتادىم. سودان بەرى ءتۇرلى تاپسىرمانى ورىنداۋعا ۇيرەتتىم. ايتقانىمدى بۇلجىتپاي ورىندايدى»، - دەيدى زامزاگۇل جاڭابايەۆا.

ونىڭ ايتۋىنشا، قۇم سالىنعان قاپشىقتى تاسۋ وڭاي ەمەس. توپىراقتىڭ سالماعى اۋىر.

«ماعان قاپشىقتاردى تاسىمالداۋ قيىن عوي. سول سەبەپتەن ءيتتى شاقىرىپ، يىعىنا قۇم سالىنعان ەكى قاپشىقتى ءىلدىم. سول قاپشىقتاردى سۇيرەلەپ، جاعاعا جەتكىزىپ بەردى» - دەيدى زامزاگۇل جاڭابايەۆا.

ەسكە سالا كەتەلىك، بۇدان بۇرىن اتىراۋداعى بوگەت قۇرىلىسىنا وزگە وڭىرلەردەن جەتكىزىلگەن تەحنيكالار تارتىلعانىن جازعان بولاتىنبىز.

كەيىن ءۇش مىڭعا جۋىق سارباز جايىق جاعالاۋىندا بوگەت سالىپ جۇرگەنىن حابارلاعان ەدىك. اتىراۋ جۇرتشىلىعىن اۋرەگە سالعان تاسقىن سۋعا قارسى كۇرەس جۇمىستارىنا جەرگىلىكتى يتتەردىڭ ءبىرى دە ءوز ۇلەسىن قوسىپ، جۇرتشىلىقتى ءتانتى قىلعانىن جازعان بولاتىنبىز.