بوريس دجونسوننىڭ باسى تاعى داۋعا قالدى
ۇلى بريتانيانىڭ بۇرىنعى پرەمەر-ءمينيسترى بوريس دجونسوننىڭ باسىنا تاعى دا قارا بۇلت ءۇيىرىلدى. ول ۇكىمەتتىڭ پاندەمياعا قارسى ارەكەتىن تەرگەۋگە باعىتتالعان تىڭداۋلارعا قاتىسىپ، سۇراقتىڭ استىندا قالدى. ءبىر جىلدان استام ۋاقىت بۇرىن ءدال وسى ماسەلە بويىنشا ساياساتكەر قىزمەتىنەن قۋىلعان بولاتىن، دەپ حابارلايدى Kazinform ءتىلشىسى.
بوريس دجونسون تىڭداۋلارعا 3 ساعات بۇرىن تاڭمەن تالاسا وتە ەرتە كەلدى. اقپارات قۇرالدارىنىڭ پىكىرىنشە، ول كوۆيدتەن قازا تاپقانداردىڭ وتباسىلارىمەن كوزبە-كوز كەزدەسىپ قالماۋ ءۇشىن وسىلاي ەتكەن.
2019-2022 -جىلدار ارالىعىندا ءۇش جىل پرەمەر-مينيستر قىزمەتىن اتقارعان دجونسوننىڭ باسى داۋعا قالىپ، وتستاۆكاعا كەتكەن بولاتىن. بۇعان كوروناۆيرۋس پاندەمياسى ءورشىپ تۇرعاندا داۋنينگ ستريتتە توي تويلاپ، ارىپتەستەرىمەن بىرگە ىشىمدىك ىشكەنى سەبەپ بولدى. ال ءدال سول كەزدە حالىق ۇكىمەتتىڭ ايتقانىن ىستەپ، ۇيدەن شىقپاي وتىرۋعان ەدى. ەندى وسى قىلىعى ءۇشىن ساياساتكەر وكىنەتىنىن ايتىپ وتىر.
«كوۆيد قۇرباندارى مەن ولاردىڭ وتباسىلارىنان كەشىرىم سۇراعىم كەلەدى. مەن ولاردىڭ جان جاراسىن جاقسى تۇسىنەمىن. وتباسى مۇشەلەرىنەن ايىرىلعان ادامدارعا قايعىرىپ كوڭىل ايتامىن»، - دەدى بوريس دجونسون.
تىڭداۋلاردىڭ تىنىش وتۋىنە كەدەرگى بولعاندار - كوۆيدتەن جاقىندارىن جوعالتقان ادامدار زالدان تارتىپكە باس يمەگەنى ءۇشىن سىرتقا شىعارىلدى. قولدارىندا قايتىس بولعان اعايىن- تۋىستارىنىڭ سۋرەتتەرىن جانە دجونسوندى ايىپتاعان ۇراندارىن ۇستاعان نارازى توپ دالادا تۇرىپ، قايعى-مۇڭدارىمەن ءبولىستى. ولار كۇيزەلىستىڭ جاندارىن جەگىدەي جەپ جۇرگەنىن ايتادى.
«نەگە بۇلاي بولعانىن بىلگىم كەلەدى. نەلىكتەن ول كوروناۆيرۋستىڭ ءبىرىنشى تولقىنىنان كەيىن قاتەلىكتەردەن ساباق المادى؟ نەگە ول ەرتەرەك لوكداۋن جاريالامادى؟ نەلىكتەن مەنىڭ انام قايتىس بولدى؟»، - دەيدى كەنت قالاسىنىڭ تۇرعىنى شارلوتتا لينچ.
«ول بۇرىن-سوڭدى بولماعان، بەيبىت ۋاقىتتاعى ەڭ ۇلكەن تراگەديالاردىڭ ءبىرى كەزىندە باسشى بولعان پرەمەر-مينيستر رەتىندە ەستە قالادى. ول ابىرويىن ايرانداي توگىپ، ماسقارا بولعان ادام. مەن كوۆيد كەزىندە اتا- انامنان ايىرىلدىم»، - دەيدى لوندون تۇرعىنى دجين ادامسون.
پاندەميا ۇلى بريتانيادا 230000 نان استام ادامنىڭ ءومىرىن قيدى جانە ميلليونداعان ادامعا جۇعىپ، ناۋقاس قىلدى. ولاردىڭ 58 پايىزى 80 جاستان اسقان قاريالار. بۇل - ەۋروپاداعى ەڭ جوعارعى كورسەتكىشتەردىڭ ءبىرى. بوريس دجونسوننىڭ پىكىرىنشە، ءوزى باسقارعان ۇكىمەت پەن ونىڭ كەڭەسشىلەرى پروبلەمانىڭ اۋقىمى مەن تارالۋ قارقىنىن جەتە باعالاماعان.
«ەگەر ءبىز ماتەماتيكالىق تۇرعىدا جاسالعان كەيبىر بولجامدارعا جەتكىلىكتى دەڭگەيدە نازار اۋدارعانىمىزدا، باسقاشا ارەكەتەر مە ەدىك؟»، - دەدى بوريس دجونسون.
جاقىندارى قايتىس بولعانداردىڭ ادۆوكاتتارىنىڭ دجونسونعا قويار سۇراعى كوپ. ولاردىڭ پايىمداۋىنشا، ساياساتكەر جازاسىز قالاتىنىن ءبىلىپ، ادامداردىڭ تاعدىرىمەن ويناعان. جۇمىس ىستەمەيتىن تەستىلەۋ جانە ناۋقاستاردى باقىلاۋ جۇيەسىنە 37 ميلليارد فۋنت قۇرتىپ، جاۋاپكەرشىلىكتى موينىنا الماي وتىر- مىس.
«ول شىندىقتى ايتۋى كەرەك. دجونسوننىڭ وسال توپتاعى ادامدارعا جانە كەدەي-كەپشىكتەرگە دەگەن كوزقاراسى، قارت كىسىلەردى قورلاپ جازعان ەلەكتروندىق حات الماسۋلارى، WhatsApp حابارلامالارى بار. ول ءوز ارەكەتى ءۇشىن ەسەپ بەرۋى كەرەك»، - دەيدى ادۆوكات اامەر انۆار.
ساياساتكەردىڭ جاۋاپتارى كوپشىلىكتى تاڭ قالدىردى. ول حالىقتان كەشىرىم سۇراي وتىرىپ، ءوز ىستەرىن تۇگەلدەي اقتاپ الۋعا تىرىستى. دجونسون پرەمەرلىكتەن قۋىلعاننان كەيىن دەپۋتاتتىق مانداتىمەن دە قوش ايتىسۋىنا تۋرا كەلدى. قازىر ول كۇندەلىكتى تارايتىن بريتانيالىق Daily Mail گازەتىنىڭ شولۋشىسى قىزمەتىن اتقارادى.
اۆتور
عالىمجان قارامان ۇلى
