بوليۆيا گەنەرالى ءساتسىز توڭكەرىستەن كەيىن قاماۋعا الىندى

استانا. KAZINFORM - بوليۆيادا اسكەريلەر ەل ۇكىمەتىن ءوز باقىلاۋىنا الۋعا تالپىنعانىمەن مەملەكەتتىك توڭكەرىس ءساتسىز اياقتالدى، دەپ جازادى The Associated Press.

ەلدە ءۇش ساعات بويى بيلىكتى اسكەري كۇشپەن باسىپ الۋدىڭ قارقىندى سەناريى بايقالدى. كوشەلەر اسكەريلەرگە تولىپ، بروندى تەحنيكالار ەل استاناسى لا-پاستاعى ۇكىمەت سارايىنىڭ ەسىگىن قاعىپ، پرەزيدەنت لۋيس ارسە ۇكىمەتىن باقىلاۋعا الدى.

جوعارى دارەجەلى گەنەرال حۋان حوسە سۋنيگي اسكەري كۇشتەر ەلدى قۇرتىپ، ونى داعدارىسقا اپاراتىن ساياساتكەرلەردىڭ ارەكەتتەرىنەن شارشاعانىن، وسىعان بايلانىستى قارۋلى كۇشتەر «ناعىز دەموكراتيانى» قالپىنا كەلتىرۋگە نيەتتى ەكەنىن ايتتى.

الايدا، ءىس باسىنداعى پرەزيدەنتتى قۇلاتۋ ارەكەتى ءساتسىز اياقتالىپ، ءتىپتى ل. ارسەنىڭ ساياسي قارسىلاستارى دا دەموكراتيانى قورعاۋ جانە كوتەرىلىستى بولدىرماۋ ءۇشىن پرەزيدەنتتى قولدادى.

ءبىر ساعات وتپەي-اق پرەزيدەنت ل. ارسە ارميانىڭ، فلوتتىڭ جانە اۋە كۇشتەرىنىڭ جاڭا باسشىلارىن جاريالادى، سودان كەيىن اسكەرلەر كوتەرىلىستى توقتاتىپ، شەگىندى.

بۇلىكشىل ارميانىڭ باس قولباسشىسى گەنەرال ح. سۋنيگي تۇتقىندالدى. باس پروكۋرور تەرگەۋدى باستادى. اسكەري-تەڭىز كۇشتەرىنىڭ ۆيتسە-ادميرالى حۋان ارنەس سالۆادور دا قاماۋعا الىندى.