بولات نازاربايەۆقا تيەسىلى بولعان بازار مەملەكەتكە قايتارىلدى

Kazinform اگەنتتىگىنىڭ ساۋالىنا جاۋاپ بەرگەن قاراساي اۋدانى اكىمىنىڭ اپپاراتى «بارىس» اۆتوبازارىنىڭ 36,7316 گەكتار بولاتىن جەر ۋچاسكەسى مەملەكەت مەنشىگىنە قايتارىلعانىن حابارلادى.

- قاراساي اۋداندىق سوتىنىڭ 2023-جىلعى 17-ساۋىردەگى 00.23.1952-2/249-شەشىمىنە، سونداي-اق قاراساي اۋداندىق سوتىنىڭ 2023-جىلعى 1-ساۋىردەگى  00.26.1993-2/781-شەشىمىنە سايكەس، قاراساي اۋدانىندا ورنالاسقان «بارىس» اۆتوبازارى مەملەكەت مەنشىگىنە ءوتتى. اتالعان سوت شەشىمدەرىنە سايكەس، جەر ۋچاسكەسى مەملەكەت مەنشىگىنە قايتارىلىپ، قولدانىستاعى زاڭناما تالاپتارىنا سايكەس ءتيىستى جەر قورىنا ەنگىزىلدى، - دەلىنگەن اۋدان اكىمدىگى جاۋابىندا.

ەسكە سالايىق، بۇعان دەيىن الماتى وبلىسىنىڭ جەر قاتىناستارى باسقارماسى بۇگىنگى بازاردىڭ جەر ۋچاسكەلەرى 2004-2018-جىلدار ارالىعىندا بولات نازاربايەۆقا اۆتوبازار اشۋ ءۇشىن جەر زاڭناماسىنىڭ تالاپتارىن بۇزا وتىرىپ بەرىلگەنىن مالىمدەگەن. اتاپ ايتقاندا، كونكۋرس وتكىزىلمەگەن جانە جەر تەلىمدەرى اۋىل شارۋاشىلىعى ماقساتىنداعى ساناتتان زاڭسىز اۋىستىرىلعان.

وسى دەرەكتەر نەگىزىندە قاراساي اۋدانىنىڭ پروكۋراتۋراسى 2023-جىلعى 10-قاڭتاردا جەردى مەملەكەت مەنشىگىنە قايتارۋ تۋرالى تالاپ ارىز ءتۇسىردى. قاراساي اۋداندىق سوتىنىڭ 2023-جىلعى 17-ساۋىردەگى شەشىمىمەن 11,5 گەكتار جەر اۋداننىڭ جەر قورىنا قايتارىلدى. كەيىن پروكۋراتۋرا «Auto market Karasay» ج ش س- نە تيەسىلى قالعان 25,5 گەكتاردان استام اۋماقتى قايتارۋ تۋرالى جاڭا تالاپ ارىز بەردى.

2026-جىلدىڭ مامىرىندا Kazinform اگەنتتىگىنىڭ ءتىلشىسى «بارىس» اۆتوبازارىنىڭ جاي-كۇيى قانداي ەكەنىن جانە وندا نە بولىپ جاتقانىن انىقتاپ قايتتى.

سونداي-اق الماتى وبلىسىنىڭ ەكس-اكىمى مارات سۇلتانعازيەۆ «بارىس» بازارى وبلىس قاراماعىنا تولىق قايتارىلعان جاعدايدا مۇندا ونەركاسىپتىك يندۋستريالىق ايماق قۇرۋ جوسپارلانىپ وتىرعانىن ايتقان بولاتىن.

بۇگىن الماتى وبلىسىنىڭ پروكۋراتۋراسى ۇيعىر اۋدانىندا 2008-جىلى جەكە مەنشىككە بەرىلگەن 29,1 گەكتار جەردى مەملەكەت مەنشىگىنە قايتارعانى بەلگىلى بولدى.