بولات اقشولاقوۆ ق ح ر ەلشىسىمەن ينۆەستيتسيالىق ىنتىماقتاستىقتىڭ پەرسپەكتيۆالارىن تالقىلادى
اتىراۋ. KAZINFORM - اتىراۋ وبلىسىنىڭ اكىمى بولات اقشولاقوۆ ق ح ر- دىڭ قازاقستانداعى توتەنشە جانە وكىلەتتى ەلشىسى حان چۋنلينمەن كەزدەستى. «دوڭگەلەك ۇستەل» فورماتىنداعى جيىنعا قازاقستاندا جۇمىس ىستەيتىن قىتايلىق كومپانيالاردىڭ وكىلدەرى دە قاتىستى.
بولات اقشولاقوۆ ايماقتىڭ قىتايمەن ەكونوميكالىق بايلانىستى نىعايتۋعا مۇددەلى ەكەنىن ايتىپ، وبلىستىڭ ينۆەستيتسيالىق الەۋەتى، «ۇينت» جانە «اتىراۋ» ارنايى ەكونوميكالىق ايماقتارى، يندۋستريالىق الاڭدار جانە ينۆەستيتسيا كولەمى شامامەن 120 ميلليون دوللار بولادى دەپ جوسپارلانعان «ەۋرازيا» تەحنولوگيالىق يننوۆاتسيالار پاركىنىڭ جوباسى جايىندا اڭگىمەلەپ بەردى.
ق ح ر ەلشىسى ىنتىماقتاستىقتىڭ ءۇش باعىتىن اتاپ كورسەتتى. ولار: ونەركاسىپ جانە ينۆەستيتسيالار، ەكولوگيالىق تەحنولوگيالار، ءبىلىم بەرۋ مەن گۋمانيتارلىق بايلانىستار.
ونەركاسىپتەگى پەرسپەكتيۆالى باعىتتار ساپىندا مۇناي مەن گازدى تەرەڭ وڭدەۋ، مۇناي-حيميا، ماشينا جاساۋ جانە لوگيستيكا بار. ەكولوگيالىق كۇن تارتىبىندە شولەيتتەنۋگە قارسى كۇرەس، سۋ ۇنەمدەۋ تەحنولوگيالارى، كارىز جۇيەلەرىن جانە اقابا سۋ تازارتۋ قۇرىلىستارىن جاڭعىرتۋ جوبالارى كورسەتىلدى. ءال بىلىم بەرۋ سالاسىندا س. وتەبايەۆ اتىنداعى اتىراۋ مۇناي جانە گاز ۋنيۆەرسيتەتى بازاسىنداعى بىرلەسكەن ءبىلىم بەرۋ ورتالىعىنىڭ جۇمىسى، ءوڭىرارالىق جانە مادەني بايلانىستى ودان ءارى دامىتۋدىڭ پوتەنتسيالى ايتىلدى.
بولات اقشولاقوۆ اۋىل شارۋاشىلىعى جانە ءونىمدى وڭدەۋ، قۇرىلىس ماتەريالدارىن شىعارۋ جانە مۇناي-حيمياعا ينۆەستيتسيا تارتۋ بويىنشا ىنتىماقتاستىققا مۇددەلى ەكەنىن ءبىلدىردى. بۇعان قوسا، سۋ ۇنەمدەۋ تەحنولوگيالارىن قولدانۋ جانە سيفرلىق شەشىمدەردى، IT- حاب پەن Smart City جوبالارىن دامىتۋدىڭ مۇمكىندىكتەرى دە تالقىلاندى.
- ءبىز سەرىكتەستەرمەن اۋىل شارۋاشىلىعى، قۇرىلىس ماتەريالدارىن شىعارۋ، ونەركاسىپ، شاعىن جانە ورتا بيزنەس سالالارىندا ءوزارا ءتيىمدى ىنتىماقتاستىق ورناتۋعا دايىنبىز، - دەدى بولات اقشولاقوۆ.
ءوڭىر باسشىسى كەزدەسۋدى قورىتا كەلە، قىتايلىق كومپانيالاردى كەلەسى جىلدىڭ باسىنا جوسپارلانعان ينۆەستيتسيالىق فورۋمعا قاتىسۋعا شاقىردى. ول وبلىستىڭ ينۆەستيتسيالىق اتلاسى دايىندالىپ جاتقانىن دا جەتكىزدى. ەلشى بۇل جايىندا مۇددەلى كومپانيالاردى حاباردار ەتۋگە دايىن ەكەنىن ايتتى. تاراپتار ىنتىماقتاستىقتىڭ پەرسپەكتيۆالى باعىتتارى بويىنشا ءارى قاراي جۇمىستانۋعا ۋاعدالاستى.
