بولگارياداعى جارىسقا قازاقستاننىڭ ەڭ ۇزدىك بوكسشىلارى قاتىسادى

استانا. KAZINFORM - اقپان ايىندا قازاق بوكسشىلارى ءۇش بىردەي ءىرى حالىقارالىق تۋرنيرگە قاتىسادى. ءۇش جارىسقا ءۇش ءتۇرلى قۇراممەن بارادى.

3-اقپان كۇنى يسپانيانىڭ لا-نۋسيا قالاسىندا «Boxam» تۋرنيرى باستالادى. وعان باراتىن بوكسشىلار انىقتالىپ قويدى. بۇل تۋرنير World Boxing ۇيىمداستىرىپ جاتقان العاشقى حالىقارالىق جارىس.

بۇل جارىسپەن قاتار سەربيادا «Belgrade Winner» تۋرنيرى باستالادى.

ال اقپانداعى باستى باسەكەنىڭ ءبىرى بولگاريا ەلىنىڭ استاناسى سوفيادا وتەدى. «ستراندجا» حالىقارالىق تۋرنيرى كىل مىقتىلاردىڭ باسىن قوسادى. جارىستى «كىشى الەم چەمپيوناتى» دەپ تە اتايدى.

بيىل بۇل جارىسقا ۇلتتىق قۇرامانىڭ ەڭ ۇزدىك بوكسشىلارى قاتىسادى دەپ كۇتىلۋدە. Sportarena.kz مالىمەتىنشە، قازاقستان قۇراماسى بولگاريادا ەڭ مىقتى قۇراممەن باق سىنايدى.

«بۇل شەشىمنىڭ سەبەبى - سوڭعى ەكى جىلدا كوماندامىزدىڭ وزبەك بوكسشىلارىنا ەسە جىبەرۋى مە، الدە ليدەرلەردى شىنايى جەكپە-جەكتە سىناۋ نيەتى مە، بەلگىسىز»، - دەپ جازادى باسىلىم.

ايتا كەتەيىك، قازاقستان قۇراماسى 13-قاڭتاردان باستاپ تۇركىستان وبلىسىندا جاڭا ماۋسىمعا دايىندىعىن باستاپ كەتتى.