بولگاريادان گرەكياعا وتكەن: ەلدەگى ورمان ءۇش كۇننەن بەرى ورتەنىپ جاتىر
استانا. KAZINFORM - بولگاريادا باستالىپ، شەكارا ارقىلى گرەكيانىڭ مەريچ پرەفەكتۋراسىنداعى سوفۋلۋ ايماعىنا وتكەن ورمان ءورتىن ءسوندىرۋ جۇمىستارى ءۇشىنشى كۇن قاتارىنان جالعاسىپ جاتىر، دەپ حابارلايدى انادولى.
گرەكيالىق ب ا ق-تىڭ حابارلاۋىنشا، ءورت بولگاريانىڭ يۆايلوۆگراد مۋنيتسيپاليتەتىنە قارايتىن گورنا-لۋكوۆو اۋىلىنىڭ ماڭىندا باستالىپ، جەكسەنبى كۇنى شەكارادان ءوتىپ، گرەكيانىڭ رۋشەنلەر جانە كىشى دەربەنت اۋداندارىنا جەتكەن.
ءورت قالىڭ ورمان القابىنىڭ بىرنەشە جەرىندە ءالى دە جالعاسىپ جاتىر. جەر بەدەرىنىڭ كۇردەلىلىگىنە بايلانىستى ءورت ءسوندىرۋ جۇمىستارىنا قاتىسىپ جاتقان جەردەگى بريگادالار قيىندىقتارعا تاپ بولىپ وتىر.
گرەكيانىڭ ءورت ءسوندىرۋ قىزمەتىنىڭ مالىمەتىنشە، ايماقتا 265 ءورت ءسوندىرۋشى، 12 جاياۋ ءورت ءسوندىرۋ بريگاداسى جانە 59 ارنايى تەحنيكا جۇمىلدىرىلعان.
ءورتتى سوندىرۋگە ۇشاقتار مەن تىكۇشاقتار دا اۋەدەن قولداۋ كورسەتىپ جاتىر.
تاڭەرتەڭ جەلدىڭ باسەڭدەۋىنە بايلانىستى ءورت ودان ءارى تارامادى. الايدا ءورتتى ءالى تولىق باقىلاۋعا الۋ مۇمكىن بولمادى.
ءورت ەلدى مەكەندەردەن الىس جەردە بولىپ جاتىر، سوندىقتان قازىرگى ۋاقىتتا اۋىلدارعا قاۋىپ تونگەن جوق.
ايتا كەتەيىك، تۇركيانىڭ ەگەي جانە جەرورتا تەڭىزى وڭىرلەرىندە ورمان ءورتى قاۋپى قىركۇيەكتىڭ سوڭىنا دەيىن ساقتالدى.
