بولگاريادا ۇلتتىق ازا تۇتۋ كۇنى جاريالاندى

ەلدىڭ مينيسترلەر كەڭەسى بۇل شەشىمدى 10-قاراشا كۇنى تاڭەرتەڭ بولگاريانىڭ وڭتۇستىك-شىعىسىنداعى يامبول وبلىسىنا قاراستى «زيمنيتسا» جولايرىعى ماڭىندا بولعان قايعىلى جول اپاتىنان كەيىن كوپ ۇزاماي قابىلدادى. قازا بولعانداردى ەسكە الۋ ءۇشىن مەملەكەتتىك مەكەمەلەردە ۇلتتىق تۋ تومەن ءتۇسىرىلدى. ۇكىمەت مارقۇمداردىڭ تۋعان-تۋىستارى مەن جاقىندارىنا كوڭىل ايتتى.

بولگاريانىڭ ىشكى ىستەر جانە دەنساۋلىق ساقتاۋ مينيسترلىكتەرىنىڭ مالىمەتىنشە، ەكى جول اپاتىنا بارلىعى 86 كولىك تۇسكەن. ونىڭ 63 ءى بۋرگاس، 23 ءى سوفيا باعىتىندا كەلە جاتقان.

جول اپاتىنان 11 ادام قازا بولدى.

ولاردىڭ 10 ى وقيعا ورنىندا كوز جۇمسا، بىرەۋى اۋرۋحانادا كوز جۇمعان. زارداپ شەككەن 51 ادام سليۆەن، يامبول جانە بۋرگاس قالالارىنداعى اۋرۋحانالارعا جەتكىزىلدى. ولاردىڭ 13 ءىنىڭ جاعدايى اۋىر.

الدىن الا مالىمەت بويىنشا، قويۋ تۇمان اسەرىنەن جول ناشار كورىنىپ، اپات ورىن العان. العاشقى جاپپاي سوقتىعىس بۋرگاس باعىتىنداعى جولاقتا جۇك كولىگى جولاۋشىلار اۆتوبۋسىنا جول بەرمەي، قوزعالىسقا كەدەرگى كەلتىرگەننەن كەيىن باستالعان. ەكىنشى جول-كولىك وقيعاسى قارسى باعىتتاعى جولاقتا بولعان.

وقيعا ورنىنا بارعان پرەمەر- مينيستر رۋمەن راديەۆ بولعان جاعدايدى «بۇكىل بولگاريا ءۇشىن قارالى كۇن» دەپ اتادى.

قايعىلى وقيعانىڭ ءمان-جايىن انىقتاۋ جالعاسىپ جاتىر. سوفيانى قارا تەڭىز جاعالاۋىمەن بايلانىستىراتىن «تراكيا» تاسجولىنىڭ اپات بولعان بولىگى كولىك قوزعالىسى ءۇشىن ۋاقىتشا جابىلدى.