«بولاشاقپەن» وقىعاننان كەيىن قازاقستاندا قىزمەت ەتۋ مىندەتتەمەسى زاڭعا قايشى ما
استانا. KAZINFORM – ق ر كونستيتۋتسيالىق سوتى «بولاشاق» باعدارلاماسىنىڭ ستيپەندياتى تۇسىرگەن شاعىمدى قارادى. ول تۇلەكتەر وقۋىن اياقتاعاننان كەيىن قازاقستان اۋماعىندا قىزمەتىن وتەۋ تالاپتارىمەن كەلىسپەيدى.
ازامات قازاقستان رەسپۋبليكاسى ۇكىمەتىنىڭ 2008-جىلعى 11-ماۋسىمداعى 573-قاۋلىسىمەن بەكىتىلگەن «بولاشاق» حالىقارالىق ستيپەندياسىن تاعايىنداۋ ءۇشىن ۇمىتكەرلەردى ىرىكتەۋ قاعيدالارىنىڭ 24-تارماعىنىڭ 5-تارماقشاسىنىڭ كونستيتۋتسياعا سايكەستىگىن تەكسەرۋ تۋرالى كونستيتۋتسيالىق سوتقا جۇگىنگەن.
سوتتىڭ مالىمەتىنشە، ءوتىنىش بەرۋشى «بولاشاق» باعدارلاماسىنىڭ تۇلەكتەرى وقۋىن اياقتاعاننان كەيىن قازاقستان اۋماعىندا قىزمەتىن وتەۋ تالاپتارىمەن كەلىسپەيدى. دالەل رەتىندە ءوتىنىش بەرۋشى ەڭبەك قىزمەتىن قاشىقتىقتان جۇزەگە اسىرۋ فورماتىن كوزدەيتىن ەڭبەك كودەكسىن كورسەتكەن. دەمەك، ءوتىنىش بەرۋشىنىڭ پىكىرىنشە، قىزمەتىن وتەۋ ماقساتىندا قازاقستان اۋماعىندا ناقتى بولۋ تالاپ ەتىلمەيدى.
الايدا كونستيتۋتسيالىق سوت «بولاشاق» باعدارلاماسى بويىنشا وقىتۋ تاراپتاردىڭ ءوزارا كەلىسىمى بويىنشا وقۋ باستالعانعا دەيىن جاسالاتىن ازاماتتىق شارت نەگىزىندە جۇزەگە اسىرىلاتىنىن كورسەتتى.
- مۇنداي كەلىسىم تاراپتاردىڭ، ونىڭ ىشىندە وقۋدان كەيىن تىكەلەي قازاقستان رەسپۋبليكاسىنىڭ اۋماعىندا قىزمەتىن وتەۋ جونىندەگى مىندەتتەمەلەردى الدىن الا ەرىكتى تۇردە قابىلداۋىن كوزدەيدى. بۇل شارت ەرەجەلەردە عانا ەمەس، ءبىلىم تۋرالى زاڭنان دا تۋىندايدى، - دەپ حابارلادى كونستيتۋتسيالىق سوتتان.
وسىلايشا، قىزمەتىن وتەۋ جونىندەگى ەرەجەلەر نورماسىنىڭ كونستيتۋتسياعا سايكەستىگىن تەكسەرۋ ءۇشىن نەگىزدەر جوق ەكەنى ايتىلعان.
ەسكە سالا كەتەيىك، بۇعان دەيىن استانا قالاسىنىڭ مامانداندىرىلعان اۋدانارالىق اكىمشىلىك سوتى 2017-جىلى «بولاشاق» حالىقارالىق ستيپەنديا باعدارلاماسى بويىنشا ۇلى بريتانيانىڭ ءبىر ۋنيۆەرسيتەتىندە ماگيستراتۋرا دارەجەسىن العان ستيپەندياتتىڭ ءوتىنىشىن قاراعانىن جازعان ەدىك. 5 جىل وتكەننەن كەيىن ستيپەنديات ۋاكىلەتتى ورگاندارعا كەپىلگە سالىنعان مۇلىكتى اۋىرتپالىقتان بوساتۋ تۋرالى وتىنىشپەن جۇگىنگەن. الايدا وعان باعدارلاما ەرەجەلەرىندە كوزدەلگەن مىندەتتى ەڭبەكپەن وتەۋدى ورىنداماعانى ءۇشىن ءوتىنىشى قاناعاتتاندىرىلماعان بولاتىن.
