«بولاشاق» تۇلەگىنە قاتىستى ماسەلە شەشىمىن تاپتى

استانا. KAZINFORM - وتانداسىمىز ۆالەريا گاۆريلەنكو «بولاشاق» باعدارلاماسىمەن ۇلى بريتانياعا وقۋعا كەتىپ، سودان قايتپاي قالعان. ول كەپىلگە قويعان مۇلكىن شىعارىپ العاننان كەيىن حالىقارالىق باعدارلامالار ورتالىعى وقۋدىڭ اقشاسىن، ناقتى ايتقاندا 30 ميلليون تەڭگە مەملەكەت قارجىسىن گارانت بولعان ءۇشىنشى تاراپ، ياعني كەپىلگەرلەردەن تالاپ ەتكەن.

«Болашақ» түлегіне қатысты мәселе шешімін тапты
Фото: ortcom.kz

«قۇرمەتتى ارىپتەستەر، بۇگىنگى ۆيدەو ۇندەۋدە مەن، ماقپال دارىبايەۆا جانە ارىپتەسىم ناتاليا ۆوروبيەۆا، «بولاشاق» حالىقارالىق باعدارلامالار ورتالىعىنداعى رەزونانستى وقيعا بەيبىت جولمەن ءوز شەشىمىن تاپقانىن ايتقىمىز كەلەدى. وزدەرىڭىز بىلەتىندەي، اپەللياتسيالىق سوتتىڭ شەشىمىمەن بىزگە مەدياتسياعا 2 اپتا ۋاقىت بەرىلگەن ەدى. وسى ۋاقىت ارالىعىندا عىلىم جانە جوعارى ءبىلىم ءمينيسترى ساياسات نۇربەك ۇلى مەن «بولاشاق» حالىقارالىق باعدارلامالار ورتالىعىنىڭ باسقارما ءتوراعاسى ءاليا قالقامان قىزىنىڭ جىلدام ارەكەت ەتۋىمەن، ۆالەريا گاۆريلەنكو كەپىلدىككە قايتا پاتەر قويىپ، وقۋعا كەتكەن شىعىننىڭ بارلىعىن ءوزى وتەيتىنىن مويىنداپ، كەلىسىمشارتقا قول قويعان»، - دەيدى ۆيدەو ۇندەۋدە ماقپال دارىبايەۆا.

سونداي-اق، كەپىلگەر قولداۋ تانىتقان جاندارعا العىسىن ايتتى.

«تۇيىتكىلدى ماسەلە شەشىمىن تاپقانشا، ءوز نازارىندا ۇستاعان مينيستر ساياسات نۇربەك ۇلىنا، ءاردايىم بىزبەن بايلانىستا بولعان ءاليا قالقامان قىزىنا العىس ايتامىز. ارينە قۇرمەتتى ارىپتەستەر، سىزدەردىڭ اقپاراتتىق قولداۋلارىڭىزدىڭ ارقاسىندا بۇل ماسەلەگە نۇكتە قويىلىپ، بەيبىت جولمەن شەشىمى تابىلدى. قازىرگى تاڭدا، ءبىزدىڭ تاراپىمىزدان «بولاشاق» ورتالىعىنا جانە دە «بولاشاقتىڭ» تاراپىنان بىزگە ەشقانداي شاعىم جوق»، - دەدى ول.

ەسكە سالا كەتەيىك، بۇعان دەيىن Kazinform اگەنتتىگىنىڭ رەسمي ساۋالىنا حالىقارالىق ورتالىق «بولاشاق» تۇلەگىنىڭ ءىسى مەدياتسيا تارتىبىمەن قارالىپ جاتقانىن جەتكىزگەن ەدى.

سوڭعى جاڭالىقتار