بولاشاق باعدارلاماسىنا وزگەرىس ەنگىزىلەدى

استانا. KAZINFORM - ەلىمىزدە حالىقارالىق عىلىمي جوبالار مەن وليمپيادالاردىڭ جەڭىمپازدارىنا «بولاشاق» باعدارلاماسى اياسىندا باكالاۆرياتقا ءتۇسۋ مۇمكىندىگى قايتا ەنگىزىلەدى. بۇل نورما سەنات دەپۋتاتتارى ماقۇلداعان زاڭ جوباسىندا قاراستىرىلعان.

Болашақ
Коллаж: Canva

«قاراستىرىلىپ وتىرعان زاڭدا (رەد. - مادەنيەت، ءبىلىم بەرۋ جانە تالىمگەرلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى) مەكتەپ تۇلەكتەرى ءۇشىن «بولاشاق» باعدارلاماسى اياسىندا حالىقارالىق وليمپيادالار مەن عىلىمي كونكۋرستاردا جەڭىسكە جەتكەندەرگە الەمنىڭ ەڭ ۇزدىك ۋنيۆەرسيتەتتەرىنە باكالاۆريات دەڭگەيىندە ءبىلىم الۋعا مۇمكىندىك بەرەتىن نورما ەنگىزىلىپ وتىر. بۇل نورمانىڭ ماقساتى - دارىندى جاستاردى قولداۋ جانە ەلىمىزدىڭ ادامي كاپيتالىن دامىتۋ. ەڭ باستىسى الەمنىڭ جەتەكشى ۋنيۆەرسيتەتتەرىندە ءبىلىم العان جانە ەلگە ورالعان تۇلەكتەردىڭ الەۋەتىن ءتيىمدى پايدالانۋ قاجەت. ءبىزدىڭ جاستارعا «بولاشاق» باعدارلاماسى ارقىلى شەتەلدىك جوعارى وقۋ ورىندارىندا ءبىلىم الۋ قانشالىقتى ءتيىمدى بولادى؟ ەكىنشىدەن، ەلگە ورالعان تۇلەكتەرگە جۇمىسقا ورنالاسۋ تۇرعىسىنان قانداي قولداۋ كورسەتىلەدى؟»، - دەپ سۇرادى سەناتور.

عىلىم جانە جوعارى ءبىلىم ۆيتسە- ءمينيسترى دارحان احمەد-زاكيدىڭ سوزىنشە، قازىرگى تاڭدا دارىندى بالالار وليمپيادالاردى جەڭگەننەن كەيىن حالىقارالىق دەڭگەيدەگى ۋنيۆەرسيتەتتەر ءوز گرانتتارىن ۇسىنىپ جاتادى.

«سوڭعى جىلدارى فيزيكا پانىنەن العاشقى ءۇش ورىندى العان بالالاردىڭ وزدەرى دە شەتەلدىك ۋنيۆەرسيتەتتەرگە ءتۇسىپ جاتىر. ولار قايتادان قايتىپ كەلگەن كەزدە دە ەلدە ءارى قاراي جۇمىس ىستەۋىنە قولداۋ كەرەگىن ءبارىمىز بىلەمىز. سوندىقتان شەتەلدىك كادرلاردى دايارلاۋ جونىندەگى رەسپۋبليكالىق كوميسسيادا حالىقارالىق كونكۋرستار مەن وليمپيادالاردىڭ ءتىزىمى بەكىتىلگەن بولاتىن. العاشقىسىندا ولار مىندەتتى تۇردە فيزيكا، ماتەماتيكا، ينفورماتيكا بولىپ ەسەپتەلىنەدى. قانداي قولداۋ كورسەتىلەدى دەگەنگە كەلسەك، «بولاشاق» باعدارلاماسىمەن قايتىپ كەلگەن جاستار ەلدە جۇمىس ىستەۋىنە قاتىستى ءبىرشاما شارتتارى بار. سولاردى ورىنداعاننان كەيىن العان مىندەتتەمەلەرىنەن بوسايدى. ال ەندى سول دارىندى بالالاردىڭ كوپشىلىگىن عىلىمعا باۋلۋعا تىرىسامىز. ويتكەنى ولاردىڭ قابىلەتتەرىنىڭ بارلىعى سوعان لايىق بولىپ كەلەدى. ءبىز بىلەتىن بالالار ءقازىر نازاربايەۆ ۋنيۆەرسيتەتىندە جۇمىس ىستەپ جاتىر»، - دەدى ۆيتسە-مينيستر.

سەنات سپيكەرى ماۋلەن اشىمبايەۆ «وليمپيادالاردى جەڭگەن بالالاردى عانا باكالاۆرياتقا جىبەرۋگە كومەك كورسەتەسىزدەر عوي؟ قالعان باعدارلاما ماگيسترانتتاردى، دوكتورانتتاردى قارجىلاندىرۋعا باعىتتالادى، سولاي ما؟ باسقا وزگەرىستەر بولعان جوق پا؟» دەپ ناقتىلادى.

«جوق، باسقا وزگەرىستەر بولعان جوق»، - دەپ قىسقا قايىردى ۆيتسە-ءمينيسترى دارحان احمەد-زاكي.

ايتا كەتەيىك، سەنات دارىندى وقۋشىلارعا گرانت ءبولۋدى كوزدەيتىن زاڭدى ماقۇلدادى.

سوڭعى جاڭالىقتار