«بولاشاق» ارقىلى دارىندى وقۋشىلاردى باكالاۆرياتقا قالاي تۇسىرۋگە بولادى

استانا. KAZINFORM – ق ر عىلىم جانە جوعارى ءبىلىم ۆيتسە-ءمينيسترى دارحان احمەد-زاكي قانداي عىلىمي وليمپيادالاردىڭ جەڭىمپازدارى «بولاشاق» باعدارلاماسىنىڭ باكالاۆرياتىنا تۇسە الاتىنىن ءتۇسىندىردى.

اتاپ ايتقاندا، مۇنداي شارا دارىندى جاستاردى قولداۋعا جانە ەلدىڭ ادامي كاپيتالىن دامىتۋعا باعىتتالعان.

- باعدارلاما اياسىندا گرانتتاردى بەرۋدى رەسپۋبليكالىق كوميسسيا جۇزەگە اسىرىپ كەلەدى. وسى مەحانيزم ءبىلىم وليمپياداسىنىڭ جەڭىمپازدارىنا دا ساقتالادى. تالاپكەرلەر جەڭىمپاز اتانعانىن راستايتىن ديپلومدى قوسا تاپسىرادى. ودان كەيىن ولاردىڭ وتىنىشتەرىن ۇلتتىق تاۋەلسىز كوميسسيا قاراپ، بارلىق شەشىمدەر رەسپۋبليكالىق كوميسسيانىڭ قاراۋىنا جىبەرىلەدى. وسى ورايدا «بولاشاق» ارقىلى وقۋعا جىبەرۋگە شەشىم قابىلدانادى، - دەدى د. احمەد-زاكي سەناتتا تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، تالاپكەرلەر ءۇشىن جوعارى وقۋ ورىندارىنىڭ ءتىزىمى «بولاشاق» باعدارلاماسىنىڭ باسقا دا ۇمىتكەرلەرىمەن بىردەي بولادى.

- ەڭ باستىسى، وسى جەردە وليمپيادالاردىڭ قوسىمشا ءتىزىمى انىقتالادى. بۇل تۇرعىدا ماڭىزدى وليمپيادالار قامتىلادى، ياعني فيزيكا، ماتەماتيكا، ينفورماتيكا جانە ينجەنەريا بويىنشا حالىقارالىق وليمپيادالار، - دەدى ۆيتسە-مينيستر.

بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت، ءبىلىم بەرۋ جانە تالىمگەرلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ماقۇلداندى.

زاڭ اياسىندا حالىقارالىق وليمپيادالار مەن كونكۋرستاردا جەڭىسكە جەتكەن دارىندى وقۋشىلارعا «بولاشاق» باعدارلاماسى ارقىلى ۇزدىك شەتەلدىك جوعارى وقۋ ورىندارىنا باكالاۆرياتقا ءتۇسۋ مۇمكىندىگى ەنگىزىلدى.