بولاشاق، ماحاببات جانە ازىلدەن تۋعان جانجال: AAIFF 2026 جەڭىمپازدارى فيلمدەرى تۋرالى ايتىپ بەردى

فەستيۆال جاساندى ينتەللەكتكە ارنالعان ءىس-شارالار توپتاماسىن بىرىكتىرگەن AI Month ايلىعى اياسىندا ۇيىمداستىرىلدى. AAIFF 2026 باعدارلاماسىنا بايقاۋ كورسەتىلىمدەرى، ىسكەرلىك باعدارلاما جانە اۆتورلار مەن كرەاتيۆتى يندۋستريا وكىلدەرىنىڭ قاتىسۋىمەن وتكەن پانەلدىك پىكىرتالاستار كىردى.

بيىل فەستيۆالگە الەمنىڭ 125 ەلىنەن 8067 ءوتىنىم ءتۇستى. رەسمي كوميسسيا ولاردىڭ ىشىنەن فينالعا 25 جۇمىستى ىرىكتەدى. فيناليستەردى يۋنەسكو-نىڭ بۇرىنعى باس ديرەكتورى ءارى فرانسيانىڭ بۇرىنعى مادەنيەت ءمينيسترى ودري ازۋلە، China Film Group جاساندى ينتەللەكت زەرتتەۋلەرى ينستيتۋتىنىڭ دەكانى ما پين، بەيجىڭ كينواكادەمياسى انيماتسيا فاكۋلتەتى دەكانىنىڭ ورىنباسارى ۆان حاو، كاسىپكەر ءارى ينۆەستور بالادجي سرينيۆاسان، سونداي-اق BytePlus كومپانياسىنىڭ تاياۋ شىعىس، افريكا، ءۇندىستان، تۇركيا جانە ت م د ەلدەرى بويىنشا باس مەنەدجەرى لي لونگ كىرگەن حالىقارالىق قازىلار القاسى باعالادى.

بايقاۋ قورىتىندىسى بويىنشا بەس ارنايى نوميناتسيا مەن The Future Worth Living In - «ءومىر سۇرۋگە تۇرارلىق بولاشاق» نەگىزگى تاقىرىپتىق باعدارلاماسىنىڭ جەڭىمپازدارى انىقتالدى.

ارنايى نوميناتسيالاردا قازاقستان، قىتاي، يتاليا، ا ق ش جانە باسقا ەلدەردىڭ اۆتورلارى جەڭىسكە جەتتى. Best Character نوميناتسياسىندا مىرزاحان جۇماحاننىڭ IT WAS JUST A JOKE فيلمى، Best Story نوميناتسياسىندا 2xLabs ۇجىمىنىڭ The Last Span جۇمىسى، Best Visual نوميناتسياسىندا ياكوپو دزانەتتيدىڭ (Jacopo Zanetti) What’s the Job فيلمى، Best Direction نوميناتسياسىندا ياكوپو رەالەنىڭ (Jacopo Reale) The Fracture كارتيناسى جانە Best Concept نوميناتسياسىندا زاكاري لوندوننىڭ (Zachary London) Pomegranate فيلمى ۇزدىك اتاندى.

ءار ارنايى نوميناتسيانىڭ جۇلدەسى 50 مىڭ دوللاردى (شامامەن 22,4 ميلليون تەڭگە) قۇرادى.

«قاراپايىم ءازىل ۇلكەن جانجالعا ۇلاسادى»

Best Character نوميناتسياسىندا قازاقستاندىق اۆتور مىرزاحان جۇماحان جەڭىمپاز اتاندى. ونىڭ فيلمى قاراپايىم ازىلدەن باستالىپ، بىرتىندەپ ۇلكەن جانجالعا ۇلاساتىن كومەديالىق وقيعانى باياندايدى.

اۆتوردىڭ ايتۋىنشا، فيلمگە كۇردەلى ماعىنا جۇكتەۋگە تىرىسپاعان، باستى ماقساتى - جەڭىل ءارى كوڭىلدى وقيعا جاساۋ.

- مەنىڭ فيلمىم كومەديا جانرىندا. وقيعا ءيت پەن يەسىنىڭ اعاسى قاراپايىم ءازىل ءۇشىن توبەلەسىپ قالۋىنان باستالادى. كەيىن ءبارى ۇلكەن جانجالعا ۇلاسادى. مەن فيلمگە قانداي دا ءبىر كۇردەلى نەمەسە استارلى ماعىنا بەرۋدى ماقسات ەتكەن جوقپىن. بۇل - مەنىڭ ءوزىمدى دە بەلگىلى ءبىر دەڭگەيدە سيپاتتايتىن جەڭىل وقيعا. ويتكەنى مەن ءازىل-قالجىڭ مەن كوڭىلدى دۇنيەلەردى ۇناتامىن. شىنىمدى ايتسام، باسەكەلەستىككە بايلانىستى قاتتى قوبالجىدىم. مۇندا تالانتتى ءارى مىقتى قاتىسۋشىلار وتە كوپ بولدى. بارلىعى فيلمدەرىن جاساۋعا كوپ كۇش پەن ۋاقىت جۇمسادى. سوندىقتان ءارقايسىسى لايىقتى قارسىلاس بولدى دەپ ويلايمىن، - دەدى مىرزاحان جۇماحان.

قىتايلىق اۆتوردىڭ فيلمىنە كونە كارتينا ارقاۋ بولعان

اشىق بايقاۋدىڭ تاعى ءبىر جۇلدەگەرى - قىتايلىق اۆتور ليۋ شۋحەن. ونىڭ جۇمىسىنا كونە قىتاي كارتيناسى نەگىز بولعان. فيلمنىڭ يدەياسى دوسىمەن اجىراۋ جانە كەيىن قايتا قاۋىشۋ تۋرالى اڭگىمەدەن كەيىن تۋعان.

فيلمدى جاساۋ كەزىندە كوماندا Seedance 2.5 جانە باسقا دا ارنايى قۇرالدى پايدالانعان.

- ءبىزدىڭ وقيعامىزعا نەگىز بولعان دۇنيە - كونە قىتاي كارتيناسى. بۇل تاقىرىپتى دوسىممەن العاش تالقىلاعان كەزدە اڭگىمە كەزدەيسوق ايىرىلىسۋ مەن قايتا قاۋىشۋ ماسەلەسىنە اۋىستى. بۇل تاقىرىپ بىزگە قىزىق كورىندى. سوندىقتان ونى فيلمنىڭ نەگىزىنە الدىق. بۇل جولى Seedance 2.5 جانە تاعى ءبىر ارنايى قۇرالدى قولداندىق، - دەدى ليۋ شۋحەن.

اۆتوردىڭ ايتۋىنشا، كوماندا سەناريمەن شامامەن ءبىر جارىم اي جۇمىس ىستەپ، فيلمدى جاساۋعا كوپ كۇش جۇمساعان.

- بۇل ماراپات ءبىز ءۇشىن وتە ماڭىزدى. سەناريدى ازىرلەۋ كەزەڭىنىڭ وزىندە ونى جەتىلدىرۋگە ءبىر جارىم اي جۇمسادىق. بۇل جۇمىسقا بار كۇشىمىزدى سالدىق، ونى جاساۋعا تولىقتاي بەرىلدىك. سوندىقتان ۇزدىك سەناري ءۇشىن ماراپات الۋ - ءبىز ءۇشىن ۇلكەن مارتەبە، - دەدى ول.

يتالياندىق رەجيسسەردىڭ فيلمى ادام تاڭداۋىن ارقاۋ ەتكەن

Best Visual نوميناتسياسىندا يتالياندىق رەجيسسەر ياكوپو دزانەتتيدىڭ What’s the Job فيلمى جەڭىسكە جەتتى. ول فيلمىندە ادامنىڭ تاڭداۋى مەن ومىردەگى ءوز جولىن تابۋ تاقىرىبىن قوزعاعان. وقيعانىڭ ۆيزۋالدى فونى رەتىندە كۇندەلىكتى جۇمىس ورتاسىنا ۇقساس كەڭسە كەڭىستىگىن پايدالانعان.

- بۇل فيلم نەگىزىنەن تاڭداۋ تۋرالى. كۇندەلىكتى جۇمىسپەن بايلانىستى كلاسسيكالىق كەڭسەنى فون رەتىندە الدىم. ءبىراق شىن مانىندە بۇل - ءومىر جانە دۇرىس تاڭداۋ جاساۋ ءۇشىن كەيدە ءوز ىسىڭە نازار اۋدارۋدىڭ ماڭىزى تۋرالى فيلم. كەيدە ادامدار بىزگە كەڭەس بەرىپ، باعىت كورسەتۋگە تىرىسادى. ءبىراق بۇل ءبىزدى ءاردايىم قاجەت جەرگە اپارا بەرمەيدى. ءار ادامنىڭ ءوز جولى بار. ءفيلمنىڭ نەگىزگى يدەياسى دا وسى، - دەپ ءتۇسىندىردى ياكوپو دزانەتتي.

قازىر دزانەتتي ميلاندا تۇرىپ، جۇمىس ىستەيدى. ول يتاليالىق UVI ستارتاپىنا ارنالعان ۆيزۋالدى جوبالارمەن اينالىسادى. كومپانيا وركەسترلەر مەن كلاسسيكالىق كونسەرتتەرگە ارنالعان شەشىمدەر ازىرلەيدى. سونىمەن قاتار رەجيسسەر جەكە فيلمدەرىن ءتۇسىرىپ، بايقاۋلارعا قاتىسادى جانە تاپسىرىسپەن جوبالار جاسايدى.

بۇعان دەيىن ول فوتوگرافيانى وقىعان، كەيىن مەحانيكالىق ينجەنەريا ماماندىعىنا تۇسكەن. الايدا سوڭىندا وقۋىن تاستاپ، كينو سالاسىنا بەت بۇرعان.

- مەن 27 جاستامىن، ۆەنەتسيادا دۇنيەگە كەلدىم. قازىر ميلاندا قىزىممەن بىرگە تۇرامىن. UVI ءۇشىن ۆيزۋالدى جوبالار جاسايمىن، سونىمەن قاتار ءوزىم ءۇشىن، بايقاۋلارعا جانە تاپسىرىس بويىنشا فيلمدەر تۇسىرەمىن. بۇعان دەيىن فوتوگرافيا وقىدىم، ال ودان بۇرىن ۋنيۆەرسيتەتتە مەحانيكالىق ينجەنەريا ماماندىعىندا ءبىلىم الدىم. ءبىراق كەيىن وقۋىمدى تاستاپ، ارمانىمنىڭ سوڭىنان ەرۋدى - فيلم ءتۇسىرۋدى تاڭدادىم، - دەدى ول.

جەڭىمپازدار جاريالانعاننان كەيىن رەجيسسەر بولعان جاعدايدى ءالى تولىق ءتۇسىنىپ ۇلگەرمەگەنىن ايتتى.

- مەن ءوزىمدى تۇسىمدە جۇرگەندەي سەزىنىپ ءجۇرمىن. ءالى كۇنگە دەيىن نە بولعانىن تولىق تۇسىنگەن جوقپىن، ءسوز تابا الماي وتىرمىن. بۇل ماراپاتقا قاتتى قۋاندىم. وسىدان كەيىن بۇل جۇمىسقا دەگەن قۇشتارلىعىم ودان ءارى ارتا ءتۇستى. وتە ريزامىن، - دەدى دزانەتتي.

نەگىزگى جۇلدە $450 مىڭدى قۇرادى

The Future Worth Living In نەگىزگى تاقىرىپتىق باعدارلاماسىنا 10 فينالدىق جۇمىس ەندى.

باعدارلاما قورىتىندىسى بويىنشا يسپانيادان كەلگەن ەرنەست دەسۋمبيلا Looking for Perseida فيلمىمەن ءۇشىنشى ورىن جانە 100 مىڭ دوللار، ءۇندىستان رەجيسسەرى ابحيك بانەردجي Sitara كارتيناسىمەن ەكىنشى ورىن جانە 200 مىڭ دوللار الدى.

ال باستى جۇلدە - 450 مىڭ دوللار - لاتۆيادان كەلگەن نيكولاي شەستاكتىڭ The First Honest Day فيلمىنە بۇيىردى.

شەستاك بۇعان دەيىن اكتەر بولعان. شامامەن ءتورت جىل بۇرىن رەجيسسۋرامەن اينالىسا باستاعان، ال ەكى جىل بۇرىن جاساندى ينتەللەكت كومەگىمەن فيلمدەر جاساي باستاعان.

رەجيسسەر بايقاۋعا ۇسىنىلعان جۇمىستاردىڭ سانى مەن جانرىنىڭ الۋان تۇرلىلىگىن ەسكەرىپ، جەڭىسكە جەتەمىن دەپ مۇلدە كۇتپەگەنىن ايتتى.

- جەڭىسكە جەتەمىن دەپ مۇلدە ويلامادىم. مۇندا كەرەمەت فيلمدەر مەن ءتۇرلى جانرداعى جۇمىستار وتە كوپ بولدى. سوندىقتان قازىلار القاسى نەگە مەنىڭ فيلمىمدى تاڭداعانىنا ءوزىم دە تاڭعالامىن. فيلم تۇسىرگەندە وعان ءوزىمنىڭ ءبىر بولشەگىمدى، ويلارىمدى قوسامىن. مۇنىڭ ءبارىن جۇمىسىمنان كورۋگە بولادى، - دەدى نيكولاي شەستاك.

باستى جۇلدەنى العاننان كەيىن رەجيسسەر الداعى جوسپارىن دا ءبولىستى. ول كينو ءتۇسىرۋدى جالعاستىرىپ، جۇلدە قارجىسىن جاڭا جوبالارىنا جۇمساماق. سونىمەن قاتار الماتىعا بارىپ، قازاقستانمەن جاقىنىراق تانىسۋدى جوسپارلاپ وتىر.

- ءبىراز دەمالىپ، استانانى تاماشالاعىم كەلەدى. ەرتەڭ العاش رەت الماتىعا ۇشامىن. قازاقتىڭ تاعامدارىنان ءدام تاتىپ، تابيعاتىن كورىپ، ادامدارمەن ارالاسقىم كەلەدى. ماعان استانا دا، قازاقستان دا قاتتى ۇنايدى. ال جۇلدە اقشاسىن جاڭا فيلمدەر تۇسىرۋگە جۇمساعىم كەلەدى، - دەدى رەجيسسەر.

«Sitara»: ارمانىنا جەتۋگە ۇمتىلعان ادام تۋرالى

نەگىزگى بايقاۋدا ەكىنشى ورىن العان ءۇندىستاندىق رەجيسسەر ابحيك بانەردجيدىڭ Sitara فيلمى قيىندىقتارعا قاراماستان مويىندالىپ، ءوز ورنىن تابۋعا ۇمتىلعان ادام تۋرالى.

باستى كەيىپكەر قاراپايىم قىزمەتكەر بولىپ جۇمىس ىستەيدى جانە جەكە ومىرىنە كوپ ۋاقىت بولە المايدى. سوعان قاراماستان ول جاعدايىن وزگەرتۋگە تىرىسادى.

- مەنىڭ فيلمىم اينالىساتىن ءىسى ارقىلى ۇلكەن جەتىستىككە جەتىپ، ءوزىن تانىتقىسى كەلەتىن ادام تۋرالى. ول ءوز ىسىندە جەتىستىككە جەتىپ، ەڭبەگىنىڭ باعالانعانىن قالايدى. ءبىراق بۇل وعان وتە قيىنعا سوعادى. ول قاراپايىم قىزمەتكەر بولىپ جۇمىس ىستەيدى جانە جەكە ءومىرى دە جوقتىڭ قاسى. سوندىقتان كەيىپكەر ءوز قالاعانىنا قول جەتكىزۋگە تىرىسىپ، سوڭىندا سيۋررەاليستىك وقيعاعا تاپ بولادى، - دەدى ابحيك بانەردجي.

رەجيسسەردىڭ ايتۋىنشا، فيلم كەيىپكەردىڭ ءومىرىن وزگەرتۋگە مۇمكىندىك ىزدەۋى مەن ءوزىن كورسەتۋگە دەگەن تالپىنىسىن سۋرەتتەيدى.

- فيلمىمدە ادام ءوز ارمانىنىڭ سوڭىنان ەرىپ، تاپ بولعان جاعدايدان شىعۋعا تىرىسادى. ول ءومىرىن ءماندى وتكىزگىسى كەلەدى. ءارقايسىمىز ءوز مۇمكىندىگىمىزدى كۇتەمىز. الەمنىڭ كەز كەلگەن جەرىندە ادام ءوزىن كورسەتۋگە مۇمكىندىك ىزدەيدى. ماعان وسىنداي مۇمكىندىك بەرىلگەنىنە، شاماسى، جولىم بولعان. الەمنىڭ تۇكپىر- تۇكپىرىندەگى ادامدار ءوز ءساتىن، ءوز تاريحىنىڭ باستى كەيىپكەرى بولۋعا مۇمكىندىك بەرەتىن كەزدى كۇتەدى، - دەدى ول.

ءۇندىستاندىق رەجيسسەر قازاقستانعا العاش رەت كەلگەن. الداعى ۋاقىتتا ول بىرنەشە تولىقمەتراجدى فيلمنىڭ سەناريىمەن جۇمىسىن جالعاستىرىپ، جۇمىستارىن حالىقارالىق فەستيۆالدەرگە ۇسىنۋدى جوسپارلاپ وتىر.

- مەن بىرنەشە تولىقمەتراجدى فيلمنىڭ ستسەنارييىن جازدىم. ولاردى مىندەتتى تۇردە تۇسىرگىم كەلەدى. ادەتتەگىدەي، ولاردى حالىقارالىق فەستيۆالدەرگە ۇسىنۋدى جوسپارلاپ وتىرمىن. بۇل - قىزىقتى جوبالار. ولاردى كورەرمەننىڭ كورگەنىن قالايمىن. ولار ادام تابيعاتى، ەموتسيا مەن دراما، كۇندەلىكتى سەزىنىپ، باستان وتكەرەتىن دۇنيەلەرىمىز تۋرالى. ءار ادام ءوز ارمانىن جۇزەگە اسىرعىسى كەلەدى. مەنىڭ فيلمدەرىمنىڭ نەگىزگى تاقىرىبى دا وسى، - دەدى رەجيسسەر.

«Looking for Perseida» : روبوت- كوۆبويدىڭ ماحاببات ىزدەۋى

ءۇشىنشى ورىندى بارسەلونادان كەلگەن ەرنەست دەسۋمبيلا Looking for Perseida فيلمىمەن يەلەندى.

كارتينا سايلاس ەسىمدى روبوت-كوۆبوي تۋرالى. ادامنىڭ جانىن ارقالاعان كەيىپكەر انتيۋتوپيالىق الەمدەگى ءشول دالانى كەسىپ ءوتىپ، سۇيىكتىسى پەرسەيدى ىزدەيدى. فيلمدەگى ەرەكشە كەيىپكەرلەردىڭ ءبىرى - جاۋىزداردىڭ ءرولىن سومدايتىن دەلفيندەر.

دەسۋمبيلا ءفيلمدى نەبارى 10 كۇندە تۇسىرگەن. فەستيۆال تۋرالى وعان ايەلى ايتىپ بەرگەن. بايقاۋ جايلى بىلگەن كەزدە جۇمىستاردى قابىلداۋ مەرزىمىنىڭ اياقتالۋىنا ساناۋلى كۇن قالعان.

- بۇل مۇمكىندىك تۋرالى ماعان ايەلىم ايتتى. فەستيۆال تۋرالى بىلگەنىمدە دەدلاينعا نەبارى ون كۇن قالعان ەكەن. العاشىندا مۇنى جاساۋ مۇمكىن ەمەس سياقتى كورىندى. ءبىراق بايقاپ كورۋگە شەشىم قابىلدادىم. ۇيگە قامالىپ الىپ، ءفيلمدى ون كۇندە ءتۇسىردىم. سوڭىندا ءبارى ويداعىداي بولعانىنا وتە قۋانىشتىمىن، - دەدى ەرنەست دەسۋمبيلا.

رەجيسسەر فيلمنىڭ يدەياسى قالاي تۋعانىن دا ايتىپ بەردى. وعان «ءومىر سۇرۋگە تۇرارلىق بولاشاق» دەگەن ءسوز تىركەسى تۇرتكى بولعان.

- فيلمىم «ءومىر سۇرۋگە تۇرارلىق بولاشاق» دەگەن سوزدەن شابىت الدى. سول كۇنى بارسەلوناداعى فەستيۆالدەن ۇسىنىس العانىمدا، سىرتتا نوسەر جاۋىپ تۇردى. سول كورىنىستى قىسقامەتراجدى فيلمنىڭ فينالى رەتىندە ەلەستەتتىم. كەيىن سول فينالعا الىپ كەلەتىن بۇكىل وقيعانى جاسادىم. وسىلايشا فيلمنىڭ سيۋجەتى بىرتىندەپ پايدا بولدى، - دەدى ول.

العان ماراپات رەجيسسەرگە جۇمىسىن جالعاستىرۋعا قوسىمشا موتيۆاتسيا بەرگەن. دەگەنمەن ونىڭ باستى كاسىبي ماقساتى وزگەرمەگەن - تولىقمەتراجدى فيلم ءتۇسىرۋ.

- وسىنداي جوبالارمەن جۇمىس ىستەۋدى جالعاستىرعىم كەلەدى. ءبىراق كوپتەن بەرگى ارمانىم - تولىقمەتراجدى فيلم ءتۇسىرۋ. بىرنەشە جوبام بار. بۇل ماراپات سول ارمانىمدى جۇزەگە اسىرۋعا كۇش پەن شابىت بەردى. اڭگىمەلەر ايتۋدى جانە جوبالارىمدى دامىتۋدى جالعاستىرعىم كەلەدى، - دەدى ول.

فەستيۆال قاتىسۋشىلارى ءۇشىن استاناعا ساپار تەك بايقاۋمەن شەكتەلمەدى. ولار ەلوردامەن تانىسۋعا دا مۇمكىندىك الدى. دەسۋمبيلا اسىرەسە قالانىڭ ساۋلەتى مەن ۇلتتىق مۋزەيگە بارعانىن ەرەكشە اتاپ ءوتتى.

- ماعان بۇل قالا وتە ۇنادى. باعدارلاما اياسىندا بىزگە استانانى كورسەتتى. باسقا ونەر ادامدارىمەن ارالاسۋ ساپاردىڭ ەڭ جاقسى بولىگى بولدى دەپ ويلايمىن. جەرگىلىكتى تۇرعىنداردىڭ قوناقجايلىعى دا ۇنادى. ءوزىمدى مۇندا ۇيدەگىدەي سەزىندىم. بۇل كەرەمەت اسەر، - دەدى رەجيسسەر.

«AI- كينونىڭ قىزىعى - تەحنولوگيانىڭ وزىندە ەمەس»

فەستيۆالدىڭ تەڭ قۇرىلتايشىسى ءارى AAIFF كرەاتيۆتى ديرەكتورى ايزات قۇسايىنوۆتىڭ ايتۋىنشا، قاتىسۋشىلاردىڭ نازارى تەك تەحنولوگياعا ەمەس، ونىڭ اۆتورلارعا اشىپ وتىرعان جاڭا مۇمكىندىكتەرىنە اۋدى.

- بۇگىنگى AI- كينونىڭ ەڭ قىزىقتى تۇسى - تەحنولوگيانىڭ ءوزى ەمەس، اۆتورلاردىڭ ونى پايدالانىپ نە جاساپ جاتقانى. فەستيۆال بارىسىندا وتە مىقتى ءارى ءبىر- بىرىنە ۇقسامايتىن جۇمىستاردى كوردىك. ولار ەرەكشە ۆيزۋالدى شەشىمدەردەن باستاپ، وقيعا ايتۋدىڭ جاڭا تاسىلدەرىنە دەيىن قامتيدى. ءارتۇرلى ەلدەردىڭ رەجيسسەرلەرى مەن اۆتورلارى AI پلاتفورمالارىن ءوز يدەيالارىن جۇزەگە اسىرۋدىڭ جاڭا قۇرالى رەتىندە قالاي پايدالاناتىنىن باقىلاۋ وتە قىزىق. ناتيجەسىندە حالىقارالىق جوبا قالىپتاستى. جۇمىستاردىڭ اۋقىمى مەن ساپاسىنا قاراپ، AI- كينو الەمدىك كينويندۋستريانىڭ دەربەس باعىتىنا اينالىپ كەلە جاتقانىن كورۋگە بولادى، - دەدى ايزات قۇسايىنوۆ.

فەستيۆالدىڭ تەڭ قۇرىلتايشىسى ءارى AAIFF كەڭەسىنىڭ ءتوراعاسى الماس جالي قاتىسۋشىلاردىڭ حالىقارالىق قۇرامىن جانە جوبانى ودان ءارى دامىتۋ جوسپارلارىن اتاپ ءوتتى.

- وسىنداي حالىقارالىق فەستيۆالدىڭ ءدال قازاقستاندا ءوتۋى وتە ماڭىزدى. استانا الەمنىڭ تۇكپىر- تۇكپىرىنەن كينويندۋستريا، تەحنولوگيا جانە كرەاتيۆتى يندۋستريا وكىلدەرى توعىساتىن الاڭعا اينالسىن دەپ وتىرمىز. العاشقى فەستيۆال بىزگە جاقسى سەرپىن بەردى. ەندى مىندەتىمىز - جوبانى ودان ءارى دامىتۋ، حالىقارالىق قاتىسۋشىلار قاۋىمداستىعىن كەڭەيتۋ جانە كينو مەن جاساندى ينتەللەكت توعىسىنداعى اۆتورلارعا جاڭا مۇمكىندىكتەر جاساۋ، - دەدى الماس جالي.

Astana AI Film Festival فەستيۆالىنىڭ جالپى جۇلدە قورى 2 ميلليون دوللاردى قۇرايدى. ونىڭ 1 ميلليون دوللارىن Freedom Holding Corp. جانىنداعى Freedom شاپاعات كورپوراتيۆتىك قورى جۇلدە قورى رەتىندە ۇسىندى. قالعان 1 ميلليون دوللار بولاشاعى زور AI- كوماندالارعا ينۆەستيتسيا رەتىندە ءبولىنىپ، قازاقستانداعى كينو ءوندىرىسى مەن AI ەكوجۇيەسىن دامىتۋعا باعىتتالادى.

2-3-قازاندا فيناليستەردىڭ جۇمىستارى MEGA Silk Way ساۋدا- ويىن-ساۋىق ورتالىعىنداعى Chaplin كينوتەاترىندا ۇلكەن ەكراننان كورسەتىلدى.

العاشقى Astana AI Film Festival حالىقارالىق كاسىبي قاۋىمداستىقتى AI- كينونى دامىتۋ جانە اۆتورلار مەن كرەاتيۆتى كوماندالارعا جاڭا مۇمكىندىكتەر اشۋ توڭىرەگىنە بىرىكتىردى. فەستيۆال كينونىڭ بولاشاعىن، شىعارماشىلىق ۇدەرىستە جاساندى ينتەللەكتىنى قولدانۋدى جانە جاڭا AI- كرەاتيۆتى يندۋستريانى دامىتۋ ماسەلەلەرىن تالقىلايتىن حالىقارالىق الاڭعا اينالدى.

بۇعان دەيىن ستۋدەنتتەر جاساندى ينتەللەكت سالاسىنداعى 515 تەن استام شەشىم ازىرلەگەنىن جازعانبىز.