بوكستان وزگە ەلدىڭ نامىسىن قورعاپ جۇرگەن قانداسىمىز ەلگە ورالدى

استانا. KAZINFORM - بوكستان وزگە ەلدىڭ نامىسىن قورعاپ جۇرگەن قازاق بوكسشىسى امان قونىسبەكوۆ وزبەكستاننان اتا-جۇرتىنا ورالدى. ەندى ول الەمدىك دودالاردا قازاقستان اتىنان، ەل ارالىق سىنداردا تۇركىستان وبلىسىنىڭ اتىنان سىنعا تۇسپەك.

بۇل تۋرالى KAZINFORM تىلشىسىنە بوكستان ۇلتتىق قۇرامانىڭ باس باپكەرى مىرزاعالي ايتجانوۆ ايتىپ بەردى.

«امان باۋىرىمىز جەلتوقسان ايىندا استانادا تۇراتىن تۋىسقان اعاسىمەن بىرگە كەلىپ تانىسىپ، ەلگە ءبىرجولا كوشىپ كەلگەنىن، ەندى الداعى ۋاقىتتا قازاق سپورتشىلارىمەن بىرگە جاتتىعىپ، سولارمەن بىرگە ەلىمىزدىڭ نامىسىن قورعاعىسى كەلەتىنىندەرىن ايتتى. ارينە، كەلەم دەگەن بالانىڭ كەۋدەسىنەن يتەرۋ تابيعاتىمىزدا جوق. ەلگە ەل قوسىلسا قۇت ەمەس پە... مەن كەلىسىم بەرەتىنىمدى ايتتىم. الايدا، كەلمەس بۇرىن وزبەكستانعا بارىپ، بۇرىنعى باپكەرىڭنەن زاڭدى تۇردە رۇقساتىڭدى الىپ كەل دەپ جىبەردىم. ول مەنىڭ تاپسىرمامدى ويداعىداي ورىنداپ كەلدى. قازىر ءبىزدىڭ بوكسشىلارمەن بىرگە الماتىداعى وقۋ-جاتتىعۋ جيىندارىندا ءجۇر. بولاشاقتا تۇركىستان وبلىسىنىڭ اتىنان سىنعا تۇسەتىن بولادى»، - دەدى باس باپكەر.

ايتا كەتەيىك، امان قونىسبەكوۆ بوكستان 2023-جىلعى وزبەكستان رەسپۋبليكاسىنىڭ چەمپيوناتىندا قولا جۇلدە ەنشىلەگەن. 71 كەلىگە دەيىنگى سالماقتا ونەر كورسەتەدى.

اۆتور كۇنسۇلتان وتارباي