بوكستان ەكى دۇركىن الەم چەمپيونى نازىم قىزايباي جىگىتتەرگە رەنىشىن جەتكىزدى

instagram.com/nazym_kyzaibay09/
Фото: instagram.com/nazym_kyzaibay09/

استانا. KAZINFORM - بوكستان قازاقستاننىڭ ايەلدەر قۇراماسىنىڭ مۇشەسى، الەمنىڭ ەكى دۇركىن چەمپيونى نازىم قىزايباي ەر ازاماتتاردىڭ قىزدارعا دەگەن قارىم-قاتىناسىنا كوڭىلى تولمايتىنىن جەتكىزدى.

TikTok جەلىسىندە ستريمدە وتىرعان بوكسشى قىزعا كورەرمەننىڭ ءبىرى ۇيلەنۋ تۋرالى ۇسىنىس جاسادى. تانىسىپ-بىلىسپەي جاتىپ مۇنداي ۇسىنىس جاساعان جىگىتكە نازىم:

«سەندەر تەك الەۋمەتتىك جەلىدە باتىلسىڭدار. قىزدىڭ كوڭىلىن اۋلاۋ دەگەن قايدا؟ ونلاين وتىرىپ باتىر بولاسىڭدار. شوكولادى بار قۇلپىناي قايدا؟ سودان باستاڭدار، سونان سوڭ گۇل جىبەرۋ كەرەك. ءوزىم تاۋشىمىلدىق (پيونى) جاقسى كورەمىن. پيون ارزان گۇل ەمەس، سوندىقتان قالتاڭا قاراۋ كەرەك. ءبىز، قىزدار، ەر ازاماتتىڭ قامقورلىق تانىتقانىن قالايمىز. اقشاڭ بولماسا، قىزىڭدى قولدان جاسالعان دۇنيەمەن قۋانت. ءوزىم رومانتيكانى جاقسى كورەمىن، جانىم سونداي»، - دەپ جاۋاپ قاتتى.

نازىم قىزدارعا ارنالعان بوكس زالىن اشۋ دا جوسپارىندا بار ەكەنىن ايتادى.

«ءوزىم تەك قىزدارعا ارنالعان بوكس زالىن اشقىم كەلەدى، سەبەبى قىزدار ءوز-ءوزىن قورعاۋدى ۇيرەنۋى كەرەك. اسىرەسە سوڭعى كەزدە ادام شوشيتىن وقيعالاردى كوپ ەستيتىن بولدىق. ءبىراق ەركەكتىڭ اتى ەركەك، ونىڭ كۇشى ءبارىبىر كوپ، سوندىقتان ەسى دۇرىس ادامدى تاڭداۋ قاجەت»، - دەدى بوكسشى قىز.

ەسكە سالايىق، نازىم قىزايباي پاريج وليمپياداسىنا جولداما بەرەتىن ليتسەنزيالىق تۋرنيرگە دايىندالىپ جاتىر. جارىس مامىر ايىندا تايلاندتا وتەدى.

سوڭعى جاڭالىقتار