بودي ماسساجدى جەلەۋ ەتىپ 2 ميلليارد تەڭگە تابىس تاپقان استانا تۇرعىنى ۇستالدى

استانا. KAZINFORM – ق م ا استانالىق دەپارتامەنتى بودي ماسساجدىڭ اتىن جامىلىپ، جەزوكشەلىكپەن اينالىسۋ ءۇشىن پريتون ۇيىمداستىرىپ، ونىمەن قويماي قىلمىستىق كىرىستەردى زاڭداستىرعان استانا تۇرعىنىن ۇستادى.

— 2021-2023-جىلدار ارالىعىندا استانا تۇرعىنى جەزوكشەلىكپەن اينالىسۋ ءۇشىن پريتون ۇيىمداستىرىپ، 2 ميلليارد تەڭگە قىلمىستىق تابىس العان. Follow the money (اقشانى قاداعالاڭىز) پاراللەلدى قارجىلىق تەرگەۋ كۇدىكتىنىڭ شوتتارىنا تۋىستارى مەن سەنىمدى تۇلعالارىنىڭ بانكتىك دەرەكتەمەلەرىن پايدالانا وتىرىپ، زاڭداستىرۋدىڭ كۇردەلى سحەمالارى ارقىلى تۇسكەن بارلىق قىلمىستىق تابىستى انىقتاۋعا مۇمكىندىك بەردى، — دەلىنگەن حابارلامادا.

قىلمىستىق تابىستى زاڭداستىرۋ ماقساتىندا كۇدىكتى ءوز اتىنا ج ش س تىركەپ، اۋىل شارۋاشىلىعى داقىلدارىن ساتىپ الىپ، قايتا ساتقان. وسىلايشا، ول 88,5 ميلليون تەڭگەنى زاڭداستىرىپ، 95 ميلليون تەڭگە قىلمىستىق تابىسقا قول جەتكىزگەن.

قىلمىستىق جولمەن الىنعان قاراجاتقا كۇدىكتى:

— 350 ميلليون تەڭگەگە سالىنىپ جاتقان وبەكتىدەگى اۋدانى 500 ش. م. كوممەرتسيالىق ءۇي-جاي؛

— 92 ميلليون تەڭگەگە ءوز بالاسىنا كۇتىم جاساپ جۇرگەن جونىندەگى جالدامالى قىزمەتكەرگە تىركەلگەن جالپى اۋدانى 329,1 ش. م. 5 ەكى بولمەلى پاتەر؛

— 667,5 ميلليون تەڭگەگە استانا قالاسىندا جالپى اۋدانى 784 ش. م. جەر ۋچاسكەلەرى بار ەكى كوتتەدج؛

— 335,4 ميلليون تەڭگەگە ەلوردانىڭ ەليتالىق تۇرعىن ءۇي كەشەندەرىندە جالپى اۋدانى 292 ش. م. 2 پاتەر مەن تۇراق ورىن؛

— 114 ميلليون تەڭگەگە G63 ماركالى Mercedes Benz اۆتوكولىگىن ساتىپ العان.

سونىمەن قاتار، ءتىنتۋ كەزىندە 50 ميلليون تەڭگە مەن باعالى زەرگەرلىك بۇيىمدار تابىلىپ، ولارعا تىيىم سالىندى.

تەرگەۋدىڭ باستالعانىن بىلگەن كۇدىكتى تاركىلەۋدەن جالتارۋ ءۇشىن 5 ەكى بولمەلى پاتەردى 143,5 ميلليون تەڭگەگە ساتىپ ۇلگەرگەن. پاتەر ساتۋ ارقىلى ۇستىنەن 51,5 ميلليون تەڭگە قوسىمشا تابىسقا كەنەلگەنى بەلگىلى بولدى.

سوت ۇكىمىمەن ول جەزوكشەلىكپەن اينالىسۋ ءۇشىن پريتون ۇيىمداستىرعانى جانە قىلمىستىق جولمەن الىنعان قاراجاتتى زاڭداستىرعانى ءۇشىن (ق ر ق ك 309-باپ، 218-باپ 3-تارماعى) 6 جىلعا باس بوستاندىعىنان ايىرىلىپ، مۇلىكى مەن پاتەرلەردى ساتۋ ارقىلى الىنعان اقشاسى تاركىلەندى، - دەپ حابارلادى ق م ا.

تەرگەۋ ناتيجەسىندە قىلمىستىق جولمەن تاپقان 2 ميلليارد تەڭگەدەن اساتىن قاراجاتقا ساتىپ الىنعان بارلىق مۇلىك پەن سول مۇلىكتەن تۇسكەن كىرىستەرى انىقتالىپ، تاركىلەندى.

سونىمەن قاتار، پاتەرلەردىڭ يەلەرى تۋرالى جالعان كۋالىك بەرگەن بالا كۇتىمى بويىنشا جالدانعان قىزمەتكەرگە قاتىستى تەرگەۋ باستالدى.

ەسكە سالا كەتەيىك، بۇعان دەيىن ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايرات ۇستالىپ، الاياقتىق جولمەن تاپقان دۇنيە-مۇلكى تاركىلەنگەنىن جازعان بولاتىنبىز.