بەسبارماق، باۋىرساق، كەسپە: ەندى ۇلان ساربازدارىنا ۇلتتىق تاعام بەرىلەدى
استانا. KAZINFORM - بۇدان بىلاي ۇلتتىق ۇلان ساربازدارىنا ۇلتتىق تاعامدار بەرىلەدى.

ۇلتتىق ۇلان باسپا ءسوز قىزمەتى تاراتقان اقپاراتقا سۇيەنسەك، قازاق حالقىنىڭ ۇلتتىق تاعامدارىن تانىمال ەتۋ مەن مادەني قۇندىلىقتاردى ساقتاۋ ماقساتىندا اسكەري قىزمەتشىلەردىڭ راتسيونىنا وزگەرىستەر ەنگىزىلدى.
جاڭارتىلعان اسكەري راتسيونعا قازاقشا ەت، سىرنە، ناۋرىز-كوجە، نارىن، كەسپە، باۋىرساق جانە باسقا دا ءداستۇرلى تاعامدار كىرەدى.
- اسكەري تاماقتانۋعا ۇلتتىق تاعامداردى ەنگىزۋ - بۇل اسپازدىق جاڭالىق قانا ەمەس، اسكەري قىزمەتشىلەرىمىزدىڭ جاۋىنگەرلىك رۋحىن نىعايتۋ مەن مادەني بىرەگەيلىگىن ساقتاۋداعى ماڭىزدى قادام، - دەيدى ۇلتتىق ۇلان باس قولباسشىسىنىڭ تىل جونىندەگى ورىنباسارى ەركەبۇلان حاميدۋللين.
ۇسىنىلىپ وتىرعان وزگەرىستەر الدىن الا قازاق تاماقتانۋ اكادەمياسىمەن كەلىسىلگەن. سەبەبى كالورياسى مەن ەنەرگەتيكالىق قۇندىلىعى جوعارى ۇلتتىق تاعامدارمەن بايىتىلعان راتسيون زات الماسۋدى، يممۋنيتەتتى جاقسارتۋعا جانە قارقىندى جۇكتەمەدەن كەيىن كۇش-قۋاتتى قالپىنا كەلتىرۋگە ىقپال ەتەدى.
- بۇل باستاما اسكەري قىزمەتشىلەردىڭ دەنساۋلىعىن نىعايتىپ قانا قويماي، ولاردى پاتريوتتىق رۋحتا تاربيەلەۋدە ماڭىزى ءرول اتقارادى، - دەيدى ۇلتتىق ۇلاننان.
ايتا كەتسەك، ۇلتتىق ۇلان قويماسىنداعى ازىق-تۇلىك قورىنىڭ جارامدىلىق مەرزىمىنە سيفرلىق باقىلاۋ ەنگىزىلدى.
تاياۋدا Kazinform ءتىلشىسى ۇلتتىق ۇلان ساربازىنىڭ ءبىر كۇنىمەن تانىسىپ، اسكەري قىزمەت ساتىنەن فوتورەپورتاج جاساعان ەدى.