بەس ميلليون ادامعا جاساندى ينتەللەكت داعدىلارى ۇيرەتىلەدى - مينيستر

استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى 2024-2029 -جىلدارعا ارنالعان جاساندى ينتەللەكتتى دامىتۋ تۇجىرىمداماسىن ازىرلەدى.

بۇل تۋرالى سالا ءمينيسترى جاسلان ماديەۆ ايتىپ بەردى.

«مەملەكەتتەردىڭ جاساندى ينتەللەكتتى قولدانۋعا دايىندىعى Oxford Insights ازىرلەگەن ادىستەمەمەن انىقتالادى. وسى ادىستەمەگە سايكەس، قازاقستان سيفرلىق الەۋەت %76 جانە دەرەكتەردىڭ قولجەتىمدىلىگى %74 كورسەتكىشتەرى بويىنشا جوعارى الەۋەتكە يە. ءبىز جاساندى ينتەللەكت سالاسىنداعى ەلدىك ستراتەگيالىق قۇجاتتاردىڭ بولماۋىنا بايلانىستى «پايىمداۋ» كورسەتكىشى بويىنشا ايتارلىقتاي ارتتا قالىپ وتىرمىز»، - دەدى ج. ماديەۆ ۇكىمەتتىڭ بۇگىنگى وتىرىسىندا.

تۇجىرىمدامانىڭ نەگىزگى ماقساتى - جاساندى ينتەللەكت ەكوجۇيەسىن قۇرۋ، ەكونوميكا جانە مەملەكەتتىك باسقارۋ سالالارىندا جاساندى ينتەللەكت تەحنولوگيالارىن ەنگىزۋ. وسى ماقساتقا جەتۋ ءۇشىن تۇجىرىمدامادا كەلەسى باعىتتار جەكە-جەكە قاراستىرىلادى: دەرەكتەر؛ ينفراقۇرىلىم؛ ادامي كاپيتال؛ عىلىمي زەرتتەۋلەر؛ رەتتەۋشى ورتا، اكسەلەراتسيالىق باعدارلامالار.

«دەرەكتەر - جاساندى ينتەللەكت دامۋىنىڭ نەگىزگى ەلەمەنتتەرىنىڭ ءبىرى. وزدەرىڭىز بىلەتىندەي، بۇل باعىتتا ۇلكەن جۇمىس اتقارىلىپ جاتىر. «ۇلتتىق اقپاراتتىق تەحنولوگيالار» اكتسيونەرلىك قوعامى مەملەكەتتىك ورگانداردىڭ دەرەكتەرىن Smart Data Ukimet كە جينايدى. وعان جاڭارتىلىپ تۇراتىن 93 دەرەكتەر بازاسى (مەملەكەتتىك ورگاندار، كۆازيمەملەكەتتىك سەكتور، جەكە كاسىپورىندار، ەكىنشى دەڭگەيدەگى بانكتەر، جوعارى وقۋ ورىندارى جانە عىلىمي ورتالىقتار) قوسىلعان. وسى مالىمەتتەر ۇلكەن دەرەكتەردى تەرەڭ تالداۋعا جانە سوعان نەگىزدەلگەن شەشىمدەر قابىلداۋعا مۇمكىندىك بەرەدى»، - دەيدى مينيستر.

ينفراقۇرىلىمدى دامىتۋ ءۇشىن قازاقستاندا سۋپەركومپيۋتەردى ورنالاستىرۋ، حالىقارالىق ارىپتەستىك ارقىلى دەرەكتەردى وڭدەۋ ورتالىقتارىن سالۋ، جاساندى ينتەللەكت ۇلتتىق پلاتفورماسىن قۇرۋ جانە تالشىقتى- وپتيكالىق بايلانىس جەلىلەرىن دامىتۋ شارالارى كوزدەلگەن.

«2029 -جىلعا دەيىن الدىمىزعا كەلەسى ماقساتتار قويىلدى: 5 ميلليون ادامدى جاساندى ينتەللەكت داعدىلارىنا ۇيرەتۋ؛ 500 مىڭ سالالىق مامان دايارلاۋ؛ 5 قازاقستاندىق بىرەگەي كومپانيا قۇرۋ؛ IT ەكسپورتتى 5 ميلليارد دوللارعا دەيىن ۇلعايتۋ؛ اكسەلەراتسيا ەسەبىنەن ەكونوميكا سەكتورلارىندا جىل سايىن كەمىندە 25 جاساندى ينتەللەكت ونىمدەرىن ەنگىزۋ. بۇل جوسپارلاردى جۇزەگە اسىرۋ جانە جاساندى ينتەللەكت ونىمدەرىن ەكونوميكاعا كەڭىنەن ەنگىزۋ ج ءى ءفو وسۋىنە ەلەۋلى ۇلەس قوسادى دەپ جوسپارلانىپ وتىر»، - دەدى ج. ماديەۆ.