بەس جىلدا ساقتاندىرۋ تولەمدەرى %70 ۇلعايدى

استانا. KAZINFORM - كەيىنگى 5 جىلدا ساقتاندىرۋ تولەمدەرى 102 ميلليارد تەڭگەدەن 176 ميلليارد تەڭگەگە دەيىن %70 ۇلعايدى. اسىرەسە مىندەتتى اۆتوساقتاندىرۋ، مۇلىكتى ەرىكتى ساقتاندىرۋ جانە اۋىرعان جاعدايدا ەرىكتى ساقتاندىرۋ كوشباسشى اتاندى.

ق ر قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ماريا حادجيەۆانىڭ ايتۋىنشا، ساقتاندىرۋ نارىعىندا تۇتىنۋشىلارعا قىزمەت كورسەتۋ ءۇشىن بارلىق قاجەتتى ينستيتۋتتار بار.

نارىقتا 25 ساقتاندىرۋ ۇيىمى جۇمىس ىستەيدى، ونىڭ ىشىندە 15 ءى «جالپى ساقتاندىرۋ» سالاسىندا جانە 10 ى «ءومىردى ساقتاندىرۋ» سالاسىندا، سونداي-اق 12 ساقتاندىرۋ بروكەرى بار.

«ءومىردى ساقتاندىرۋ» سالاسى ساقتاندىرۋ نارىعىنىڭ ءوسۋ درايۆەرى بولىپ وتىر. بيىل 1-قاراشادا بۇل سالا ساقتاندىرۋ نارىعىنىڭ جيىنتىق اكتيۆتەرىنىڭ ەڭ كوپ ۇلەسىن الادى (%52,5). كەيىنگى 5 جىلدا سالا اكتيۆتەرى 2 ەسەدەن استام ءوسىپ، 1,5 تريلليون تەڭگەگە جەتتى. بۇل مەملەكەتتىك ءبىلىم بەرۋ جيناقتاۋ جۇيەسى شەڭبەرىندە ساقتاندىرۋ ءونىمى، بىرلەسكەن جانە كەيىنگە قالدىرىلعان زەينەتاقى اننۋيتەتتەرى سياقتى جاڭا الەۋمەتتىك باعدارلانعان ساقتاندىرۋ ونىمدەرىن ەنگىزۋ ارقىلى مۇمكىن بولدى»، - دەدى سپيكەر ورتالىق كوممۋنيكاتسيالار قىزمەتىندە وتكەن بريفينگىدە.

ءومىردى ساقتاندىرۋ سالاسى بويىنشا ساقتاندىرۋ تولەمدەرى كەيىنگى 5 جىلدا 5 ەسەگە، اتاپ ايتقاندا، 21 ميلليارد تەڭگەدەن 91 ميلليارد تەڭگەگە دەيىن ۇلعايدى. تولەمدەردىڭ نەگىزگى كولەمى قىزمەتكەرلەردى جازاتايىم وقيعالاردان مىندەتتى ساقتاندىرۋعا جانە ءومىردى ەرىكتى ساقتاندىرۋعا تيەسىلى.

«جالپى ساقتاندىرۋ سالاسى بارلىق نەگىزگى كورسەتكىش بويىنشا ءوسۋدى كورسەتۋدە - ساقتاندىرۋ كومپانيالارىنىڭ اكتيۆتەرى كەيىنگى 5 جىلدا %56 ۇلعايىپ، 1-قاراشاداعى جاعداي بويىنشا 1,4 تريلليون تەڭگەنى قۇرادى. بۇل ساقتاندىرۋ نارىعىنىڭ جيىنتىق اكتيۆتەرىنىڭ %47,5 قۇرايدى»، - دەدى م. حادجيەۆا.