بەس جىلعا سوتتالعان ۆاينەر مەيىرجان تورەبايەۆ ۇيىنە كەلدى
الماتى. KAZINFORM - قارجى پيراميداسىن قۇردى دەپ سوتتالعان مەيىرجان تورەبايەۆ ۇيىنە كەلدى. بۇل تۋرالى ونىڭ جۇبايى دانا ەسەيەۆا ءوزىنىڭ الەۋمەتتىك جەلىسىندە جازىپ، ۆيدەوسىن جاريالادى.
«مەيىرجاننىڭ زاڭدا بەلگىلەنگەن قىسقا مەرزىمدى دەمالىسى بار (113-باپ، مەكەمەدەن تىس ءجۇرۋ). بالالاردىڭ باقىتتان باسى اينالىپ وتىر. كىشىلەرى سوڭعى كەزدەسۋدەن كەيىن عانا تىلدەرى شىققان، اكەلەرىنە سۇراقتى جاۋدىرتىپ جاتىر. ۇلكەندەرى اكەلەرىنىڭ جانىندا ءۇنسىز عانا وتىر. جاقىن ارادا ونىڭ پاۆلودارعا قايتا كەتەتىنىن ءتۇسىنىپ، بارىنشا قۇشاقتاپ قالىپ جاتىر. وندا مەيىرجان كۇندىز «ەڭبەك» رەسپۋبليكالىق مەملەكەتتىك كاسىپورنىندا جۇمىس ىستەپ، كەشكە مەكەمەگە قايتادى. ەڭ باستىسى، انانىڭ جۇرەگى تىنىشتالدى. ۇزاق بولماسا دا، جالعىز ۇلى قاسىندا»، - دەپ جازدى دانا ەسەيەۆا.
ايتا كەتەيىك، بىلتىر ماۋسىم ايىندا مەيىرجان تورەبايەۆ قىلمىستىق كودەكستىڭ 217-بابى بويىنشا كىنالى دەپ تانىلىپ، سوت ۇكىمىنە سايكەس، ەڭ تومەنگى قاۋىپسىزدىك كولونياسىندا بەس جىل باس بوستاندىعىنان ايىرۋ جازاسىنا كەسىلگەن بولاتىن.
وسى جىلدىڭ باسىندا ۆاينەرلەر مەيىرجان تورەبايەۆ پەن مەيىرحان شەرنيازوۆ سوتقا اپپەلياتسيالىق شاعىم ءتۇسىردى.
الايدا اپەللياتسيالىق سوت ۆاينەرلەرگە قاتىستى ۇكىمدى وزگەرىسسىز قالدىردى.
