بريتانيالىق باسىلىم قازاقستاندى ساياحاتتاۋعا بولاتىن توپ 24 ەلدىڭ قاتارىنا قوستى
شەتەلدىك ايگىلى جۋرنال قازاقستاندى كەلەسى جىلى ساياحاتتاۋعا بولاتىن توپ 24 ەلدىڭ قاتارىنا قوستى.
Kazinform بۇل تۋرالى Wanderlust باسىلىمىنا سىلتەمە جاساپ حابارلايدى.
باسىلىم رەداكتورلارى جىل سايىنعى ءداستۇر بويىنشا ساياحاتتى جوسپارلاۋ ءۇشىن الەمنىڭ تۇكپىر-تۇكپىرىنەن ەڭ جاقسى ءارى ەڭ قىزىقتى باعىتتاردى تاڭداپ الدى.
قازاقستان تابيعاتى ەرەكشە ۇلتتىق پاركتەرىمەن، زاماناۋي قالالارىمەن جانە ەرەكشە مادەنيەتىنە بايلانىستى ۇسىنىلعان.
الداعى V دۇنيەجۇزىلىك كوشپەندىلەر ويىندارىن (2024 ج. 7-15-قىركۇيەك، استانا) اسىعا كۇتە وتىرىپ، Wanderlust وقىرماندارىن ۇلى دالانىڭ قىزىقتى تاريحىن بەينەلەيتىن كوشپەلى حالىقتاردىڭ كوپ عاسىرلىق مادەنيەتىمەن تانىسۋعا شاقىرادى.
قازاقستاندى رەيتينگىگە ەنگىزۋ يدەياسىن «Kazakh Tourism» ۇ ك ا ق ۇسىنعان.
«بيىل ەلىمىزدىڭ تۋريزم سالاسىندا ءبىرقاتار وڭدى وقيعا بولدى: التىن-ەمەل يۋنەسكو- نىڭ بۇكىلالەمدىك مۇرالار تىزىمىنە ەنگىزىلدى، الماتى وبلىسىنداعى ساتى اۋىلى دۇنيەجۇزىلىك مۇرا سايتى بويىنشا ەڭ جاقسى تۋريستىك اۋىلداردىڭ ءبىرى اتاندى. كەلەسى جىل دا جارقىن وقيعالارعا تولى بولادى»، - دەدى قازاق تۋريزم باسقارما ءتوراعاسىنىڭ مىندەتىن اتقارۋشى قايرات ءسادۋاقاسوۆ.
Wanderlust 1993 -جىلى نەگىزى قالانعان ۇلىبريتانيانىڭ جەتەكشى تۋريستىك جۋرنالى. ول ۇلى بريتانيا جانە ەۋروپادا ءالى كۇنگە دەيىن شىعارىلاتىن ەڭ كونە تۋريستىك جۋرنال. سونداي- اق ABC دەرەكتەرى بويىنشا ۇلى بريتانيا باسىلىمدارىنىڭ ىشىندەگى تارالىمى ەڭ جوعارى باسىلىم. جۋرنال جاڭا تۋريستىك باعىتتارعا، ەرەكشە ساياحاتتارعا جانە كەرەمەت اسەر الۋعا باعىت بەرەدى.
