بريتاندىقتاردىڭ تورتتەن ءبىر بولىگى كەدەيشىلىكتە ءومىر سۇرەدى

استانا. KAZINFORM - ۇلى بريتانيانىڭ الەۋمەتتىك كورسەتكىشتەر جونىندەگى كوميسسياسىنىڭ (SMC) ەسەبىنە سايكەس، ۇلى بريتانياداعى بالالاردىڭ ۇشتەن ءبىرى مەن ەرەسەكتەردىڭ تورتتەن ءبىرى كەدەيلىك شەگىنەن تومەن ءومىر سۇرەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

قۇجات اۆتورلارى ەلدەگى كەدەيلىك دەڭگەيى XXI عاسىرداعى رەكوردتىق دەڭگەيگە جەتكەنىن اتاپ ءوتتى. 2019 -جىلدان باستاپ ءومىر ءسۇرۋ قۇنىنىڭ ءوسۋى جاعدايدى ناشارلاتىپ، قوسىمشا 2,1 ميلليون بريتاندىققا اسەر ەتتى.

بۇگىنگى تاڭدا ەلدە 16 ميلليون بريتاندىق كەدەيلىك جاعدايىندا ءومىر ءسۇرىپ جاتىر. ولاردىڭ ىشىندە 5,2 ميلليونى - بالالار، 9,2 ميلليونى  ەڭبەككە قابىلەتتى جاستاعى ەرەسەكتەر جانە 1,5 ميلليونى - زەينەتكەرلەر. بۇل دەگەنىمىز، ەلدىڭ ءاربىر ءتورتىنشى تۇرعىنى (%24) كەدەي دەگەندى بىلدىرەدى.

داعدارىس اسىرەسە بالالارعا قاتتى اسەر ەتتى. ەسەپكە سايكەس، 2022/23 وقۋ جىلىندا كامەلەتكە تولماعانداردىڭ ۇشتەن ءبىرى (%36) كەدەيلىك جاعدايىندا بولدى. بۇل 2019/20 وقۋ جىلىمەن سالىستىرعاندا بەس پايىزعا ءوستى.

كوميسسيا كەدەيلىكتى قازىرگى ماتەريالدىق قاجەتتىلىكتەردى قاناعاتتاندىرۋ ءۇشىن رەسۋرستاردىڭ جەتىسپەۋشىلىگى رەتىندە انىقتايدى. كەدەيلىكتىڭ نەگىزگى كورسەتكىشى ادامنىڭ قازىرگى ۋاقىتتا ونىڭ تىكەلەي قاجەتتىلىكتەرىن جابۋ ءۇشىن جەتكىلىكتى ماتەريالدىق رەسۋرستارى بار-جوعىن باعالاۋعا باعىتتالعان.

ەستەرىڭىزگە سالا كەتەيىك، ءبىز بۇعان دەيىن ۇلىبريتانيا ەكونوميكاسى نولدىك وسىمگە دەيىن باياۋلاعانىن جازعان بولاتىنبىز.

كەدەيلىك پەن اشتىققا قارسى كۇرەس - برازيليادا اشىلعان «ۇلكەن جيىرمالىق» G20 ءسامميتىنىڭ ماڭىزدى ماسەلەلەرىنىڭ ءبىرى.

اۆتور
ەركەجان سماعۇلوۆا