ونىڭ ادام نانعىسىز عاجاپ داۋىسى جۇرەگىمىزدى جاۋلاپ الدى - ديماشتىڭ بريتاندىق جانكۇيەرلەرى
لوندون. KAZINFORM - ديماش قۇدايبەرگەننىڭ دۇنيە ءجۇزى بويىنشا جانكۇيەرلەرى سۇيىكتى ءانشىسىن 30 جاسقا تولعان مەرەيتويىمەن قۇتتىقتاپ جاتىر. اسىرەسە، ۇلى بريتانياداعى تىڭدارماندارى بەلسەندى.
ولار ارنايى بەينەبايان ءتۇسىرىپ، الەۋمەتتىك جەلىلەرگە جاريالادى، دەپ حابارلايدى Kazinform-نىڭ وسى ەلدەگى مەنشىكتى ءتىلشىسى عالىمجان قارامان ۇلى.
ۇلى بريتانيادا ديماشتىڭ ەكى فان- كلۋبى بار. ونىڭ مۇشەلەرى دۇنيەنى دالا داۋسىمەن ءدۇر سىلكىندىرگەن قازاق بالاسىنىڭ ونەرىنە عاشىق. اندەرىن ءتۇسىنۋ ءۇشىن ۇلى اباي ءتىلىن ۇيرەنىپ، قازاقستانعا ساياحاتتاپ تا ءجۇر. 30-دان استام ادام لوندوننىڭ كورنەكتى ورىندارىندا جينالىپ، انشىگە جۇرەكجاردى لەبىزدەرىن جەتكىزدى. ۇلى بريتانيانىڭ عانا ەمەس، رەسەي، برازيليا، رۋمىنيا جانە باسقا دا مەملەكەتتەردىڭ ازاماتتارى قولدارىنا قازاقستاننىڭ جانە ۇلى بريتانيانىڭ تۋلارىن ۇستاپ، جۇرتشىلىقتىڭ نازارىن وزدەرىنە اۋداردى. قاماجاي ءبيىن بيلەپ، قازاق تىلىندە ءان ايتتى.
«ءبىز ۇلى بريتانياداعى ديەرستار قاۋىمى ديماشقا قۇتتىقتاۋىمىزدى جولدايمىز. ونىڭ ادام نانعىسىز عاجاپ داۋىسى ءبىزدىڭ جۇرەگىمىزدى جاۋلاپ الدى. ال مۋزىكاسى الەمنىڭ تۇكپىر-تۇكپىرىندەگى حالىقتى بىرىكتىردى. ديماش، سەنىڭ ونەردەگى قاناتىڭ تالماسىن. اندەرىڭ ءبىزدى شابىتتاندىرا بەرسىن. كەزەكتى كونسەرتىڭدى اسىعا كۇتەمىز. ۇلى بريتانياداعى جانكۇيەرلەرىڭ سەنى جاقسى كورەدى»، - دەدى فان كلۋبتىڭ نەگىزىن قالاۋشى انكا تيموفتە.
اۆتور
عالىمجان قارامان ۇلى
