بريتان حالقىن كەدەيشىلىك قامىتى قىستى
لوندون. KAZINFORM - ۇلى بريتانيا حالقى بىرنەشە كۇننەن كەيىن بيلىك پارتياسىن تاڭداپ، داۋىس بەرەدى. سايلاۋالدى ناۋقان باستالعالى پرەمەر-مينيستر ريشي سۋناك ينفلياتسيا دەڭگەيى تومەندەپ، جاعداي جاقساردى دەۋدەن جالىقپاي كەلەدى.
ءبىراق ەلدەگى ميلليونداعان سايلاۋشىنىڭ تۇرمىس دەڭگەيى ءالى دە تومەن. ازىق-تۇلىك جانە جارىق پەن گازدىڭ باعاسى الدىڭعى جىلدارمەن سالىستىرعاندا اسپانداپ تۇر. يپوتەكالىق نەسيە پايىزى ەسەلەنىپ، پاتەر جالداۋ اقىسى دا قىمباتتاپ كەتكەن، دەپ حابارلايدى Kazinform اگەنتتىگىنىڭ لوندونداعى ءتىلشىسى عالىمجان قارامان ۇلى.
دومينيك ۋوتتەرس ءجاسوسپىرىم قىزىن جالعىز ءوزى تاربيەلەپ كەلەدى. مەملەكەتتەن العان جاردەماقىسى ءىشىپ-جەمىنە ارەڭ جەتەدى.
تولىققاندى اس دايىندايىن دەسە گاز بەن ەلەكتر ەنەرگياسىنىڭ اقىسى قالتا كوتەرمەيدى.
سوندىقتان جالعىزباستى اكە قايىرىمدىلىق ۇيىمى بەرگەن تاماقتى قىسقا تولقىندى پەشكە ىسىتىپ، تالعاجاۋ ەتىپ ءجۇر.
«بالاعا جاردەماقى الىپ، كۇن كورەتىنىم جانىمدى جەگىدەي جەيدى. ءومىردىڭ قاتالدىعىنان شارشادىم. ءبىز سياقتى وتباسى وتە كوپ. ولار ءارى قاراي قالاي ارەكەت ەتۋ كەرەكتىگىن بىلمەيدى. ءبىز، ءتىپتى، ءبىرىنشى قاجەتتىلىكتەگى زاتتاردى دا الا المايمىز»، — دەيدى جالعىزباستى اكە دومينيك ۋوتتەرس.
شەنەۋنىكتەر بولسا، قۇرعاق ساندار ستاتيستيكاسىن كەلتىرگەننەن ءارى اسا الماي وتىر. ولار مامىر ايىندا ينفلياتسيا دەڭگەيىنىڭ ماقساتتى ەكى پايىزعا قايتا ورالعانىن العا تارتادى.
بيلىككە لەيبوريستەر پارتياسى كەلسە، جاعداي باسقاشا بولار ەدى دەيدى قارجى ءمينيسترى.
مەملەكەتتىك سەكتوردا جۇمىس ىستەيتىندەردىڭ نارازىلىققا شىققانىن ايىپتاپ، باسقا دا باتىل شەشىمدەر قابىلداماعاندا جاعداي قيىن بولار ەدى دەيدى ول.
«ءبىر جارىم جىل بۇرىن بىزدەگى ينفلياتسيا دەڭگەيى باسقا ءىرى ەكونوميكالارعا قاراعاندا جوعارى بولدى. بۇگىن ول تومەندەدى. بۇل ءبىزدىڭ بىلەك سىبانا ارەكەت ەتۋىمىزدىڭ ارقاسىندا جۇزەگە استى. سالىقتار تومەندەپ جاتىر جانە يپوتەكا ارزاندايدى دەپ ۇمىتتەنەمىن»، — دەدى ۇلى بريتانيا قارجى ءمينيسترى دجەرەمي حانت.
كولەڭكەلى ۇكىمەتتىڭ قارجى ءمينيسترى جانە لەيبوريستەر پارتياسىنىڭ وكىلى رەيچەل ريۆز ينفلياتسيا دەڭگەيىنىڭ ماقساتتى كورسەتكىشكە ورالعانىن قۇپتايدى.
ءبىراق قاراپايىم حالىق قىمباتشىلىق قىسپاعىنان قۇتىلا الماي وتىر جانە ءومىر ءسۇرۋ قۇنىنىڭ داعدارىسى القىمنان الدى دەيدى ول.
«كوپتەگەن وتباسى جانە زەينەتكەر ءۇشىن ءومىر ءسۇرۋ قۇنىنىڭ داعدارىسى ءالى دە وتكىر تۇر. ويتكەنى بۇعاۋسىز كەتكەن باعالارعا توقتام جوق. پاتەر جالداۋ قۇنى، يپوتەكا، ازىق- تۇلىك اقىسى نەمەسە ەلەكتر ەنەرگياسى ءۇشىن تولەمدەر كەدەيشىلىكتىڭ قامىتىن كيگەندەردى قىسپاققا الدى»، — دەدى ۇلى بريتانيا كولەڭكەلى ۇكىمەتىنىڭ قارجى ءمينيسترى، لەيبوريستەر پارتياسىنىڭ مۇشەسى رەيچەل ريۆز.
انگليا بانكى بولسا، ينفلياتسيانى تەجەۋ ءۇشىن پايىزدىق مولشەرلەمەنى جەتىنشى رەت وزگەرىسسىز قالدىردى.
بۇل — سوڭعى 16 جىلدا بولماعان ەڭ جوعارى كورسەتكىش. ساراپشىلار قۋانۋعا ءالى ەرتە دەپ ەسەپتەيدى.
«ينفلياتسيا وسى جىلدىڭ سوڭىندا ازداپ كوتەرىلۋى مۇمكىن. تەك كەلەسى جىلى ول ەكى پايىزعا قايتا ورالادى. بۇل ەنەرگيا كوزدەرىنىڭ قىمباتتاۋىمەن بايلانىستى قۇبىلىس»، دەدى KPMG حالىقارالىق اۋديت-كونسالتينگتيكتىك ۇيىمنىڭ باس ەكونوميسى ياەل سەلفين.
ينفلياتسيانى ماقساتتى دەڭگەيگە جەتكىزگەن بيلىك پارتياسىنا دەگەن سايلاۋشىلاردىڭ سۇيىسپەنشىلىگى ارتا ما؟ ساۋالنامالارعا سەنسەك باعانى تۇراقتاندىرا الماعان كونسەرۆاتورلارعا حالىق اشۋلى. ايلىعى ازدار بايلىعى كوپ ريشي سۋناكقا وكپەلى.
«ريشي سۋناك، ءسىز باسىنىپ بارا جاتقان باعانى رەتكە كەلتىرمەسەڭىز بولمايدى! بۇل ماسەلەگە جاۋاپتى ادام قىمباتشىلىقتى اۋىزدىقتاسىن. ءبىزدىڭ ازىق- تۇلىك ساتىپ الۋعا شامامىز جوق. ءبىز ميلليونەر ەمەسپىز، قاراپايىم ادامبىز. جالاقىمىز بۇرىنعى دەڭگەيدە قالدى!» دەدى بلوگەر فارا شامس.
پاندەميادان سوڭ 2021-جىلدىڭ ەكىنشى جارتىسىندا ينفلياتسيا باتىس ەكونوميكالارىنىڭ كوپشىلىگىندە قارقىن الدى. ۋكرايناداعى جاعدايدان كەيىن جاعداي ءتىپتى قيىنداپ، تابيعي گاز باعاسى كۇرت ءوستى. سوڭعى 3 جىلدا ۇلىبريتانيادا ازىق-تۇلىك باعاسى شامامەن 20 پايىزعا قىمباتتادى.
بۇل ءوز كەزەگىندە ءومىر ءسۇرۋ دەڭگەيىنىڭ تومەندەۋىنە اكەلىپ، سايلاۋشىلاردىڭ كونسەرۆاتورلارعا دەگەن سەنىمى جوعالدى.
ءبىراق بيلىككە قاي پارتيا كەلسە دە ەكونوميكانى قايتا قالپىنا كەلتىرۋ ءۇشىن ءبىراز ەڭبەك جانە ساتتىلىك قاجەت دەيدى ساراپشىلار.
