بريۋسسەل جۇرتشىلىعى «دوس- مۇقاسان» فيلمىن ەرەكشە ىقىلاسپەن تاماشالادى

 سەيسەنبى كۇنى بريۋسسەلدەگى «Cinema Palace» كينوتەاترىندا «دوس- مۇقاسان» فيلمى كورسەتىلدى، دەپ حابارلايدى قازاقپارات مەنشىكتى ءتىلشىسى.

дос-мұқасан
Фото: Қазақстанның Белгиядағы елшілігі

مادەني شارا قازاقستاننىڭ بەلگياداعى ەلشىلىگىنىڭ قولداۋىمەن ءوتتى. فيلم قازاق تىلىندە اعىلشىن سۋبتيترىمەن كورسەتىلدى.

كارتينانى تاماشالاۋعا بەلگيادا تۇراتىن قازاق قاۋىمىنىڭ وكىلدەرى، سونداي- اق ەلىمىز ونەرىنە قىزىعۋشىلىق تانىتقان جەرگىلىكتى حالىق كەلدى.

كورەرمەندەردىڭ ءبىرى فەريسەل ليۆيۋ «دوس- مۇقاسان» فيلمىن كورۋگە قۋانا كەلىسكەنىن جەتكىزدى. ول انسامبل مۇشەلەرى قازاقستانعا تانىمال تۇلعالار ەكەنىن، سونىمەن قاتار ونىڭ قۇرىلۋىنىڭ ۇلكەن تاريحى بارىن ايتتى. سوندىقتان بەلگيا تۇرعىنى كينوتەاترعا اسا قىزىعۋشىلىقپەن كەلگەن.

قازاقستان رەسپۋبليكاسىنىڭ بەلگياداعى توتەنشە جانە وكىلەتتى ەلشىسى مارعۇلان بايمۇحان «دوس- مۇقاسان» فيلمىنىڭ ەۋروپا استاناسىندا كورسەتىلۋى - تاعى ءبىر تاماشا مادەني وقيعا ەكەنىن اتاپ ءوتتى.

«بۇگىن ەۋروپالىق جانە بەلگيالىق كورەرمەن ءۇشىن اتى اڭىزعا اينالعان «دوس- مۇقاسان» ءانسامبلى تۋرالى قىزىقتى فيلم كورسەتتىك. ونى ءبىزدىڭ ەلدە بىرنەشە بۋىن وكىلدەرى بىلەدى جانە شىعارمالارىن ءسۇيىپ تىڭدايدى. بۇگىن رەجيسسەر ايدىن ساحامان تۇسىرگەن، ۇجىمنىڭ ۇزاق تا، قىزىقتى جولىن باياندايتىن وسى فيلممەن ءبولىسۋدى ءجون كوردىك. فيلمنىڭ «جەڭىل» بولعانى سونشا، ەۋروپالىق جۇرتشىلىق ونى جوعارى ىقىلاسپەن قابىلدادى. قازاقستاندىق فيلم ەۋروپالىق كينودان ءسال وزگەشە بولۋى مۇمكىن، ءبىراق بەلگيالىق كورەرمەننىڭ رەاكسياسى ولارعا قازاقستاندىق انسامبل تۋرالى ءتۇسىرىلىم ۇناعانىن كورسەتتى. وسى يگى ءداستۇردى جالعاستىرامىز دەپ ويلايمىن»، - دەدى مارعۇلان بايمۇحان.

ايتا كەتەيىك، ءتۇسىرىلىم جەتى ايعا جۋىق ۋاقىتقا سوزىلدى. فيلم 2022 -جىلى شىقتى. سەنارييىن جازعان - ەفرات شارىپوۆ، پروديۋسەرى - ايگۇل بايبەك، مۋزىكالىق جەتەكشىسى - ايدىن ساحامان.

اكتەرلىك قۇرام پورترەتتىك ۇقساستىق بويىنشا تاڭدالعان. باستى رولدەردى اكتەر مەيىرعات امانگەلدين، ماقسات ءسابيتوۆ، ەلدوس شايكەنوۆ، سايات ماقۇلبايەۆ، ايعانىم ساعىنبايەۆا، نيكيتا پوگودايەۆ، نۇرعيسا قۋانىشباي ۇلى جانە ءابىلمانسۇر سەرىكوۆ سومدادى. تانىمال بلوگەرلەر مەن ۆاينەرلەر ارتۋر اسقار ۇلى مەن زۋحرا سايپي دە دەبيۋتتىك ءرولىن ويناپ شىقتى.

«دوس- مۇقاسان» فيلمىنىڭ جابىق كورسەتىلىمى وتكەن جىلدىڭ 27-قىركۇيەگىندە ءوتتى. ال ەكى كۇننەن كەيىن قازاقستاننىڭ بارلىق كينوتەاترلارىنا پروكاتقا شىقتى.

"دوس- مۇقاسان" —1967 -جىلى قۇرىلعان ەسترادالى ۆوكالدى اسپاپتار ءانسامبلى. نەگىزىن قالاعان - دوسىم سۇلەيەۆ، مۇرات قۇسايىنوۆ، قاميت سانبايەۆ، الەكساندر ليتۆينوۆ. توپتىڭ اتاۋى دا وسى انشىلەردىڭ ەسىمىنەن قۇرالعان. ءار جىلدارى انسامبل قۇرامىندا باقىتجان ءجۇمادىلوۆ، مەيىربەك مولدابەكوۆ، ءشارىپ وماروۆ، قۇرماناي وماروۆا، نۇرتاس قۇسايىنوۆ، اقجول مەيىربەكوۆ جانە تاعى باسقالارى بولدى.

سوڭعى جاڭالىقتار