بۇرىنعى ۆيتسە-مينيستر التايەۆتىڭ ءىسى جابىق سوت وتىرىسىندا قارالاتىن بولدى

بۇگىن استانادا قىلمىستىق كودەكسىنىڭ 366-بابى 4-بولىگىمەن ايىپ تاعىلعان نۇرجان التايەۆقا قاتىستى قىلمىستىق ءىس بويىنشا الدىن الا سوت تىڭداۋى اياقتالدى، دەپ حابارلايدى kazinform.

وتىرىس بارىسىندا پروكۋروردان قىلمىستىق ءىستى جابىق سوت وتىرىسىندا قاراۋ تۋرالى ءوتىنىش ءتۇستى. وعان سەبەپ - ءىس بويىنشا كۋاگەر ءوزىنىڭ جانە وتباسى مۇشەلەرىنىڭ ومىرىنە بەلگىسىز ادامداردىڭ تاراپىنان قاۋىپ ءتونىپ تۇرعانىن ايتقان.

«پروتسەسكە قاتىسۋشىلاردىڭ قاۋىپسىزدىگىن قورعاۋ ماقساتىندا سوت پروكۋروردىڭ ءوتىنىشحاتىن قاناعاتتاندىردى جانە قىلمىستىق ءىستى جابىق سوت وتىرىسىندا قاراۋ تۋرالى شەشىم قابىلدادى»، - دەلىنگەن سوت مالىمەتىندە.

ەسكە سالا كەتەيىك، بيىلعى 7- ماۋسىمدا ءماجىلىستىڭ ەكس-دەپۋتاتى نۇرجان التايەۆ اسا ءىرى مولشەردە پارا الدى دەگەن كۇدىكپەن ۇستالدى (ق ك 366-بابىنىڭ 4-بولىگى).

ن. التايەۆ 2018-جىلدىڭ اقپانىنان 2020-جىلدىڭ شىلدەسىنە دەيىن «اتامەكەن» ۇ ك پ مۇددەلەرى ءۇشىن ءتيىمدى رەسمي شەشىم قابىلداۋعا ىقپالداسىپ، دەلدال ارقىلى ا. مىرزاحمەتوۆتەن پارا رەتىندە جالپى سوماسى 50 ميلليون تەڭگەدەن استام (115 مىڭ ا ق ش دوللارى جانە 8 ميلليون 150 مىڭ تەڭگە) اقشالاي قاراجات الدى دەپ ايىپتالىپ وتىر.

قىلمىستىق ءىس 15 تومنان تۇرادى، ءىس بويىنشا 18 كۋاگەر بار.