بۇرىنعى سوت ورىنداۋشىلارى اليمەنت اقشاسىن قالاي جىمقىرىپ ءجۇر - ادىلەت ءمينيسترىنىڭ جاۋابى

ادىلەت ءمينيسترى ازامات ەسقارايەۆ قىزمەتتەن شەتتەتىلگەن سوت ورىنداۋشىلارى اليمەنتتىڭ اقشاسىن قالاي قولعا ءتۇسىرىپ ءجۇر، دەپ حابارلايدى Kazinform اگەنتتىگى.

«جاقىندا استانادا بۇرىنعى سوت ورىنداۋشىلارى 100 ميلليون تەڭگەگە جۋىق بالالاردىڭ اقشاسىن جەكە پايداسىنا جۇمساعانى تۋرالى اقپارات جاريالاندى. ولار بۇل قاراجاتتى قالاي ۇرلاپ ءجۇر»، - دەپ سۇرادى جۋرناليست ازامات ەسقارايەۆتان.

ءمينيستردىڭ سوزىنشە، بۇل قولدانىستاعى زاڭنامانىڭ شيكىلىگنەن تۋىنداعان ماسەلە.

«وتە ورىندى سۇراق. ءوزىمىز دە بۇل سۇراققا قاتتى كوڭىل ءبولىپ جاتىرمىز. ويتكەنى بۇرىنعى زاڭناما سولاي جاسالعان. ياعني سوت ورىنداۋشىلارى جينالعان اقشانى ءوز قاراماعىنداعى شوتقا جيناي الادى ەكەن. ول شوتقا ەشقانداي تىيىم سالىنبايدى. جاپا شەككەن جاس وسپىرىمدەردىڭ اقشاسىن جىمقىرۋ دەگەن ادام ساناسىنا كىرمەيتىن نارسە. سوندىقتان، ءبىزدىڭ قىزمەتكەرلەر وسىندايلارعا جول بەرمەس ءۇشىن ناقتى زاڭعا وزگەرىستەردى دايىنداپ جاتىر. جاقىن ارادا ءتيىستى ورگاندارعا كىرگىزەمىز»، - دەدى ۆەدومستۆو باسشىسى.