بۇرىنعى قورعانىس ءمينيسترى جاپونيانىڭ جاڭا پرەمەر-ءمينيسترى بولادى

استانا. KAZINFORM - جاپونيانىڭ ليبەرالدى-دەموكراتيالىق پارتياسى (ل د پ) جاڭا كوشباسشى سايلادى. بۇل جاپون ساياساتىنىڭ ارداگەرى سيگەرۋ يسيبا، ول سونىمەن بىرگە جاپونيانىڭ كەلەسى پرەمەر-ءمينيسترى بولادى، ويتكەنى ل د پ پارلامەنتتە باسىم داۋىسقا يە، دەپ جازادى BBC.

پرەمەر-مينيستر فۋميو كيسيدا وتكەن ايدا قايتا سايلاۋعا تۇسپەيتىنىن جاريالاعاننان كەيىن توعىز كانديدات پارتيا باسشىسى لاۋازىمىنا تالاستى.

ل د پ جاپونيانى سوعىستان كەيىنگى جىلداردا ۇزاق باسقاردى. پارتيا كوشباسشىسىن اۋىستىرۋ قيىن بولدى. سەبەبى پارتيا ءىشى سوڭعى ۋاقىتتا جانجالدار مەن ىشكى كيكىلجىڭگە تولى بولدى، بۇل پارتيا ىشىندەگى بىرنەشە ىقپالدى فراكسيانىڭ تارالۋىنا اكەپ سوقتى.

قوعامدىق ساۋالنامانىڭ كوپشىلىگىندە 63 جاستاعى يسيبا كوش باستادى. بۇل ونىڭ ل د پ- نى باسقارۋعا جاساعان بەسىنشى ارەكەتى جانە ول بۇل جولى جەڭىلسە، بولاشاقتا پارتيانى باسقارۋعا تاعى دا ۇمتىلاتىنىن ايتتى.

يسيبانىڭ ليبەرالدى كوزقاراسى پارتيالاستارى اراسىندا ۇنەمى قولداۋ تابا بەرمەيدى.

ماسەلەن، ول ايەلدەردىڭ يمپەراتور تاعىنا وتىرۋ مۇمكىندىگىن جاقتاۋىمەن تانىمال. بۇل - جاپون قوعامى ءۇشىن وتە نازىك ءارى داۋلى ماسەلە. ال لدپ مۇشەلەرىنىڭ كوپشىلىگى بۇعان قارسى.

يسيبا سونداي-اق بۇرىنعى پارتيا جەتەكشىسى جانە پرەمەر-مينيستر فۋميو كيسيدانى بىرنەشە رەت جانە كوپشىلىك الدىندا سىنعا الدى، مۇنداي جاعداي جاپون ساياساتىندا كوپ كەزدەسە بەرمەيدى.

يسيبانىڭ ەكىنشى تۋرداعى قارسىلاسى ساناە تاكايتي، كەرىسىنشە، پارتيانىڭ ەڭ كونسەرۆاتيۆتى قاناتىنا جاتادى.