بۇرىنعى مينيستر قۋاندىق بيشىمبايەۆقا قاتىستى تاعى ءبىر سوت پروتسەسى وتەدى

استانا. KAZINFORM - بۇرىنعى ۇلتتىق ەكونوميكا ءمينيسترى قۋاندىق بيشىمبايەۆقا قاتىستى تاعى ءبىر سوت پروتسەسى وتەدى.

بۇل تۋرالى Tengrinews.kz تىلشىسىنە بيشىمبايەۆتىڭ ادۆوكاتى ەرلان عازىمجانوۆ حابارلادى.

عازىمجانوۆتىڭ ايتۋىنشا، الداعى سوت تالقىلاۋى اليمەنت تولەۋ تۋرالى كەلىسىمدى وزگەرتۋگە بايلانىستى.

«بۇل كەلىسىم قۋاندىق بوستاندىقتا جۇرگەن كەزدە، بيزنەسپەن اينالىسىپ، تۇراقتى تابىسى بولعان كەزدە جاسالعان. سول كەزدە بالالارعا تولەنەتىن اليمەنت مولشەرى جوعارى كورسەتىلگەن. قازىر جاعداي وزگەردى - ونىڭ تابىسى جوق، اليمەنتتى ونىڭ اتا-اناسى تولەۋگە ءماجبۇر بولدى. سونداي-اق قۋاندىقتىڭ جيناعان قاراجاتى بولعان، سول جەردەن دە قاراجات الىنعان»، - دەدى ول.

ادۆوكاتتىڭ ايتۋىنشا، كولونيادا بيشىمبايەۆ جۇمىس ىستەمەيدى، سەبەبى «بوس جۇمىس ورىندارى از». اليمەنت كەلىسىمىنىڭ شارتتارىن عازىمجانوۆ قۇپيا دەپ اتادى.

سونىمەن قاتار، ادۆوكاتتىڭ ايتۋىنشا، مارقۇم سالتانات نۇكەنوۆانىڭ اعاسى ايتبەك امانگەلدىمەن بايلانىستى تاعى ءبىر سوت پروتسەسى ءوتۋى مۇمكىن.

«تاعى ءبىر سوت پروتسەسى بولادى. سالتانات نۇكەنوۆانىڭ اعاسى جوعارعى سوتقا مورالدىق وتەماقى مولشەرىن ارتتىرۋ تۋرالى تالاپپەن كونستيتۋتسيالىق شاعىم ءتۇسىردى. شاعىم جوعارعى سوتتا تىركەلگەن، ءبىراق كونستيتۋتسيالىق سوتقا بەرىلە مە، ول ءالى بەلگىسىز. جالپى، ول 1,5 ميلليارد تەڭگە تالاپ ەتكەن. ءبىرىنشى ينستانتسيا سوتى 10 ميلليون تەڭگە ءوندىرۋ تۋرالى شەشىم شىعاردى. بۇل قاراجات تولەندى. ءبىراق ول 1,5 ميلليارد تەڭگەنى تالاپ ەتۋدى جالعاستىرىپ جاتىر. اپەللياتسيالىق سوت شەشىمدى وزگەرىسسىز قالدىردى»، - دەدى ەرلان عازىمجانوۆ.

ەسكە سالايىق، بۇعان دەيىن قۋاندىق بيشىمبايەۆتىڭ وتباسى بالالارعا اليمەنت تولەۋدەن باس تارتقانى حابارلاندى.

نازىم قاحارمان قۋاندىق بيشىمبايەۆپەن 14 جىل رەسمي نەكەدە بولدى. ەرلى-زايىپتى 2020-جىلى اجىراسقان ەدى. ولاردىڭ ءۇش بالاسى بار.