بۇرىنعى مادەنيەت ۆيتسە - مينيسترىنە قاتىستى تەرگەۋ اياقتالدى

استانا. قازاقپارات - 1 ميلليارد تەڭگەدەن استام قاراجاتتى جىمقىردى دەپ ايىپتالعان مادەنيەت جانە سپورت مينيسترلىگىنىڭ بۇرىنعى ۆيتسە- مينيسترىنە قاتىستى تەرگەۋ امالدارى اياقتالدى، دەپ حابارلايدى انتيكور.

سىبايلاس جەمقورلىققا قارسى قىزمەت قوعامدا زاڭدىلىق پەن ءتارتىپ قاعيداتىن قامتاماسىز ەتۋ، سونداي-اق جوعارى لاۋازىمدى تۇلعالار اراسىنداعى سىبايلاس جەمقورلىقتى جويۋ بويىنشا جۇمىستارىن جالعاستىرۋدا. وسىلايشا، اگەنتتىك مادەنيەت جانە سپورت مينيسترلىگىنىڭ بۇرىنعى ۆيتسە-ءمينيسترى جانە مەردىگەر ۇيىم باسشىلىعىنا قاتىستى اۋىر قىلمىس جاساعانى بويىنشا تەرگەۋدى اياقتادى.

- ولار قىزمەتتىك وكىلەتتىكتەرىن اسىرا پايدالاندى جانە 1 ميلليارد تەڭگەدەن استام قاراجاتتى جىمقىردى دەپ ايىپتالۋدا. وتكەن جىلدىڭ 13 - جەلتوقسانىندا باس پروكۋراتۋرا كۇدىكتىلەردى سوتقا بەردى. قىلمىستىق- پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى، - دەلىنگەن انتيكور تاراتقان اقپاراتتا.

ايتا كەتەيىك، كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق- پروتسەستىك كودەكستىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.

ەسكە سالساق، بىلتىر ناۋرىز ايىندا سىبايلاس جەمقورلىققا قارسى قىزمەت سوتقا دەيىنگى تەرگەپ-تەكسەرۋ شەڭبەرىندە بۇرىنعى مادەنيەت جانە سپورت ۆيتسە- ءمينيسترى اۋىر سىبايلاس جەمقورلىق قىلمىس جاسادى دەگەن كۇدىكپەن ۇستالعانىن راستادى.

كەيىننەن ونىڭ 2 اي قاماۋدا وتىراتىنى حابارلاندى.