بۇرىنعى كۋرسانتتار اسكەري وقۋ ورىندارىنا ونلاين تۇردە قايتا قابىلدانا الادى
استانا. KAZINFORM - اسكەري وقۋ ورىندارىنىڭ بۇرىنعى كۋرسانتتارى قالپىنا كەلۋ ءۇشىن eGov.kz پورتالى ارقىلى ونلاين ءوتىنىم بەرە الادى.
ءول ۇشىن eGov.kz پورتالى ارقىلى ءوتىنىم بەرۋ جەتكىلىكتى. قىزمەت تەگىن كورسەتىلىپ، كەمىندە ءبىر سەمەستر وقۋدى اياقتاعاندارعا قولجەتىمدى بولادى.
- بۇرىن قالپىنا كەلتىرۋ پروتسەدۋراسى كۇردەلى بولىپ، جەكە قاتىسۋدى تالاپ ەتەتىن. ۇمىتكەرلەر وقۋ ورنىنا ءوتىنىش بەرىپ، جەكە كۋالىك، ترانسكريپت، قىزمەت ورنى سيپاتتاماسى، فوتوسۋرەت، اسكەري كۋالىك كوشىرمەسى جانە باسقا دا قۇجاتتاردى قامتيتىن كەڭ پاكەتتى جيناۋى كەرەك ەدى، - دەلىنگەن حابارلامادا.
ەندى پروتسەسس جەڭىلدەتىلدى: ونلاين تۇردە ءوتىنىش بەرىپ، قاجەتتى قۇجاتتاردىڭ كوپشىلىگى مەملەكەتتىك دەرەكتەر بازاسىنان اۆتوماتتى تۇردە جۇكتەلەدى. وقۋ ورنىنان شىعارىلعاننان كەيىن ءبىر جىل ىشىندە عانا ءوتىنىش بەرۋگە بولاتىنىن ايتا كەتۋ كەرەك. ەگەر بۇل مەرزىم اياقتالسا، وقۋ ورنىندا قالپىنا كەلتىرۋ مۇمكىن بولمايدى.
كورسەتىلەتىن قىزمەتتى الۋ ءۇشىن:
eGov.kz پورتالىندا تىركەلىپ، «ازاماتتارعا» - «اسكەري ەسەپكە الۋ جانە قاۋىپسىزدىك» - «اسكەري قىزمەت» بولىمىنە ءوتۋ كەرەك؛
«قازاقستان رەسپۋبليكاسى قورعانىس مينيسترلىگىنىڭ اسكەري وقۋ ورىندارىنا قالپىنا كەلتىرۋ» كورسەتىلەتىن قىزمەتىن تاڭداپ، «قىزمەتكە ونلاين تاپسىرىس بەرۋ» تۇيمەسىن باسۋى ءتيىس؛
وقۋ ورنىن تاڭداپ، وقۋدان شىعارىلعاننان بەرى قانشا ۋاقىت وتكەنىن كورسەتىپ، جەكە دەرەكتەرىن پايدالانۋعا كەلىسىم بەرۋى ءتيىس؛
تۇراتىن مەكەنجايىن كورسەتىپ، قۇجاتتاردى قوسۋى ءتيىس؛
قولجەتىمدى قول قويۋ ادىستەرىنىڭ بىرىمەن وتىنىشكە قول قويۋعا ءتيىس؛
قىزمەتتىڭ ناتيجەسى پايدالانۋشىنىڭ جەكە كابينەتىندە «قىزمەتتەردى الۋ تاريحى» بولىمىندە قولجەتىمدى بولادى.
ءوتىنىمدى قاراۋ مەرزىمى 20 جۇمىس كۇنى. ەگەر وڭ شەشىم قابىلدانسا، ناتيجە پايدالانۋشىنىڭ جەكە كابينەتىنە ەلەكتروندىق فورماتتا جىبەرىلەدى. ەگەر قالپىنا كەلتىرۋ مۇمكىن بولماسا، ستۋدەنت تە دالەلدى باس تارتۋ حاتىن الادى.
جاڭا كورسەتىلەتىن قىزمەت سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ مەملەكەتتىك كورسەتىلەتىن قىزمەتتەر كوميتەتىنىڭ، ۇلتتىق اقپاراتتىق تەحنولوگيالار اق جانە قورعانىس مينيسترلىگىنىڭ ىنتىماقتاستىعىمەن ىسكە قوسىلدى.
ايتا كەتەلىك ەلىمىزدە اسكەري وقۋ ورىندارىنا ءتۇسۋ قاعيدالارى وزگەرگەن ەدى.
